ინფორმაციას საერთაშორისო გამჭვირვალობა — საქართველო ავრცელებს.

რატომ არის მნიშვნელოვანი: არასამთავრობო ორგანიზაციების ცნობით, საქართველოს მთავრობამ 20 წლის განმავლობაში პირველად თქვა უარი ეკონომიკური თანამშრომლობისა და განვითარების ორგანიზაციის ანტიკორუფციული ქსელის (OECD/ACN) მონიტორინგში მონაწილეობაზე.

  • ამასთან, საქართველო ერთადერთი ქვეყანაა, რომელიც მონიტორინგს არ დასთანხმდა, განსხვავებით უკრაინის, მოლდოვის, სომხეთის, აზერბაიჯანის, ყაზახეთის, ყირგიზეთის, უზბეკეთის, ტაჯიკეთისა და მონღოლეთისგან.
  • NGO-ების განცხადებით, OECD/ACN-ის მონიტორინგის პროცესი ევროკავშირის მიერაა მხარდაჭერილი და საქართველოს შემთხვევაში, შესაძლოა, გავლენა იქონიოს კანდიდატის სტატუსის მიღებაზეც.

დეტალები: TI-ის შეფასებით, საქართველოს მთავრობის მიერ ანტიკორუფციული გარემოს შეფასებაზე უარი აზიანებს ქვეყნის რეპუტაციას და კითხვის ნიშნის ქვეშ აყენებს ამ მიმართულებით გასატარებელ რეფორმებს.

  • "ამ მიმართულებით რეფორმების შეჩერება პირდაპირ წინააღმდეგობაში მოდის საქართველოს ევროკავშირში ინტეგრაციის მისწრაფებასთან, რადგან ანტიკორუფციული რეფორმების გატარება საქართველო-ევროკავშირის ასოცირების ხელშეკრულების ერთ-ერთი ვალდებულებაა", — ნათქვამია განცხადებაში.
  • არასამთავრობოები მოუწოდებენ მთავრობას, დაუბრუნდეს სტამბოლის სამოქმედო გეგმის (IAP-ის) ფარგლებში დაწყებულ მონიტორინგის პროცესს და გააგრძელოს თანამშრომლობა ეკონომიკური თანამშრომლობისა და განვითარების ორგანიზაციის ანტიკორუფციული ქსელთან.