სარჩელით ადამიანის უფლებათა ცენტრმა თბილისის საქალაქო სასამართლოს მიმართა.

დეტალები: გრიგორიადისი მოითხოვს, პატივისა და ღირსების შემლახველი განცხადების გავრცელების გამო პრემიერმინისტრ ირაკლი ღარიბაშვილსა და ქართული ოცნების თავმჯდომარე ირაკლი კობახიძეს მორალური ზიანის ანაზღაურება დაეკისროთ.

  • დაკავებული აქტივისტი მორალური ზიანის სახით, სიმბოლურად, 15 ლარს ითხოვს.
  • ასევე, მოსარჩელე მოითხოვს ღარიბაშვილმა და კობახიძემ ბოდიში საჯაროდ მოიხადონ.

გრიგორიადისის საქმე: რუსული კანონის საწინააღმდეგო აქციის მონაწილე, 21 წლის აქტივისტი, პოლიციამ 29 მარტს დააკავა, 31 მარტს კი სასამართლომ აღკვეთის ღონისძიების სახით პატიმრობა შეუფარდა.

  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • დაკავების შემდეგ მის წინააღმდეგ ქართულმა ოცნებამ მადესკრედიტირებელი და პროპაგანდისტული კამპანია წამოიწყო.
  • მმართველი გუნდის თავმჯდომარემ გრიგორიადისს "გზას აცდენილი კაცი" უწოდა და თქვა, რომ მას "ყველანაირი ორიენტაცია არეული აქვს" — კობახიძის ამ განცხადებას, სავარაუდოდ, ჰომოფობიური ქვეტექსტი ჰქონდა.
  • ადვოკატმა სააპელაციო სასამართლოს 2 აპრილს მიმართა და პატიმრობის გირაოთი შეცვლა მოითხოვა, რაზეც უარი მიიღო.
  • პირველ მაისს გამართულ პროცესზე სასამართლომ გრიგორიადისი პატიმრობაში დატოვა.
  • გრიგორიადისის უფლებების დარღვევაზე მისმა ადვოკატმა არაერთხელ ისაუბრა.
  • ლიკა ბითაძის თქმით, ბრალდებულს აღიარებითი ჩვენება მეგობრის დაკავების მუქარითა და ადვოკატთან გასაუბრების გარეშე მიაცემინეს, პენიტენციურ დაწესებულებაში კი თავი ნების საწინააღმდეგოდ გადაპარსეს.