ტიტანიკისკენ მიმავალი წყალქვეშა ნავის 19 წლის მგზავრის, სულემან დავუდის, დედამ ახლახან მიცემულ ინტერვიუში განაცხადა, რომ ქმართან ერთად ბორტზე თავად უნდა ყოფილიყო. კრისტინ და შაჰზადა დავუდებმა წყალქვეშა ნავის ბილეთები გაცურვამდე დიდი ხნით ადრე შეიძინეს და ტიტანიკის ნახვას ერთად აპირებდნენ, თუმცა ქალმა გადაწყვიტა, რომ ადგილი შვილისთვის დაეთმო, რადგან მამასთან ერთად წასვლა უნდოდა.

შეგახსენებთ, რომ აშშ-ის სანაპირო დაცვის სამსახური და კომპანია OceanGate ადასტურებენ, რომ რამდენიმე დღის წინ ატლანტის ოკეანეში გაუჩინარებულ წყალქვეშა ნავზე მყოფი ყველა ადამიანი გარდაცვლილია. ბორტზე მყოფ 5 მგზავრს შორის მამა-შვილი შაჰზადა და სულემან დავუდებიც იყვნენ.

ფოტო: Getty Images

კრისტინ დავუდმა BBC-თან ინტერვიუში განაცხადა, რომ ტიტანიკის ნამსხვრევების სანახავად ქმართან ერთად ადგილები ჯერ კიდევ COVID-19-ის პანდემიამდე დაჯავშნა. პანდემიის დაწყების გამო, წყალქვეშა ნავით გაცურვა დიდი ხნით გადაიდო. შემდეგ კი გადაწყვიტა, ტიტანიკის ნამსხვრევების ნახვის შესაძლებლობა შვილისთვის მიეცა, რადგან მას მამასთან ერთად წასვლა ძალიან უნდოდა.

"მათთან ერთად მეც ბედნიერი ვიყავი, რადგან ამის გაკეთება ორივეს დიდი ხნის განმავლობაში სურდა. ახლა კი ისინი ძალიან, ძალიან მენატრებიან", — განაცხადა კრისტინმა ქმარ-შვილის შესახებ. კრისტინის თქმით, სულემანი რუბიკის კუბიკით იყო გატაცებული და აპირებდა, რომ ოკეანის სიღრმეშიც ამოეხსნა.

რაც შეეხება ოჯახის სხვა წევრებს, NBC-თან ინტერვიუში სულემანის მამიდამ, აზმე დავუდმა განაცხადა, რომ თავის ძმისშვილს ტიტანიკის ნამსხვრევების სანახავად წასვლა არ უნდოდა. აზმემ აღნიშნა, რომ სულემანი მზად არ იყო და ძალიან ეშინოდა, თუმცა ექსპედიციაში მონაწილეობაზე მამის გამო დათანხმდა. 18 ივნისი მამის დღე იყო და სულემანმა გადაწყვიტა, რომ ამ დღეს დრო მამასთან ერთად გაეტარებინა.

ასევე იხილეთ: