როგორც იქნა, ნანატრი ივნისის ბოლო მოახლოვდა და მუსიკის მოყვარულებს შეგვიძლია, გამორჩეული ქართველი და უცხოელი მუსიკოსების შემოქმედებით ღია ცის ქვეშ, დაუვიწყარ გარემოში ვისიამოვნოთ. 23, 24 და 25 ივნისს ლისის საოცრებათა ქვეყანა კავკასიის რეგიონში ყველაზე მასშტაბურ მუსიკალურ ფესტივალ Tbilisi Open Air-ს მასპინძლობს.

ამ სტატიაში 5 რჩევას გაგიზიარებთ, რომელიც დაგეხმარება, Tbilisi Open Air-ზე მომზადებული მიხვიდე, რათა ფესტივალზე მაქსიმალურად კარგი დრო გაატარო და ივნისის ბოლო უქმეები დაუვიწყარ მოგონებებად აქციო:

1. მზად იყავი წვიმისთვის

დარწმუნებულები ვართ, გულმა გიგრძნო, რომ პირველი ეს რჩევა იქნებოდა. შარშანდელმა წვიმამ ყველა დაგვარწმუნა, რომ ცხოვრება ყოველთვის გეგმის მიხედვით არ მიდის. მართალია, სჯობს შეცვლილ გეგმებს მოვერგოთ და სიამოვნების მიღებაზე უარი არ ვთქვათ, მაგრამ არც სათანადოდ მომზადება იქნება ზედმეტი.

წელს ფესტივალზე აუცილებლად წასაღებ ნივთებს შორის პირველი უდავოდ საწვიმარია. წყალგამძლე ფეხსაცმელი ან ბოტებიც არ იქნებოდა ურიგო, რათა საყვარელ მელოდიებს ხტუნვითა და ცეკვით თამამად აჰყვე. თუ ღუნღულა პლედში ან მოსაცმელში გაეხვევი, სიცივეც ვერაფერს დაგაკლებს! გახურებაში ცეკვა და კარგი განწყობაც დაგეხმარება.

2. ...მაგრამ გჯეროდეს, რომ მზეც გამოანათებს

წვიმის მოლოდინის მიუხედავად, არც იმის იმედი დაკარგო, რომ მზე გამოანათებს. ამ შემთხვევაში სათვალე, მზისგან დამცავი საშუალება და ქუდი გამოგადგება და მათთვის შენს ჩანთაში ადგილის გამონახვას გირჩევთ. სიცხეში სასმელი წყლის მომარაგება განსაკუთრებით მნიშვნელოვანია და არც ეგ დაგავიწყდეს.

3. მოიძიე ინფორმაცია კვების ობიექტებზე

კარგ ფესტივალსა და კარგ მუსიკას გემრიელი საჭმელი უხდება. Tbilisi Open Air-ზე შენი საყვარელი რესტორნები და კვების ობიექტები იქნება წარმოდგენილი და ღია სივრცეში მუსიკის ფონზე განსაკუთრებული კერძების დაგემოვნების შესაძლებლობა ხელიდან არ უნდა გაუშვა. კვების ობიექტების შესახებ ინფორმაციის მისაღებად Tbilisi Open Air-ის ფეისბუქგვერდს ადევნე თვალი და წინასწარ დაგეგმე, სად რას გასინჯავ. თუმცა ლისზე მისულს ნურც ექსპერიმენტების შეგეშინდება.

4. წინასწარ დაგეგმე მგზავრობის მარშრუტი

ფესტივალის დღეს ტრავოლტასავით დაბნეული რომ არ იყო და გზის გაგნებაში საათები არ დახარჯო, უმჯობესია, მგზავრობის მარშრუტი წინასწარ დაგეგმო. ისარგებლე ფესტივალის ტრანსპორტით, ველოსიპედით ან თუ არ გეზარება, ფეხით ამოისეირნე.

5. დაიჭირე თადარიგი, რათა ყველა შემსრულებელს მიუსწრო

მუსიკალურ ფესტივალზე ყველაზე მთავარი მაინც ისაა, რომ საყვარელი შემსრულებლები ლაივში ვიხილოთ და მათი მუსიკისგან მაქსიმალური სიამოვნება მივიღოთ. ამისათვის, ყურადღებით შეისწავლე ლაინაფი და სცენები და იმის მიხედვით გადაწყვიტე, ვის, სად და როდის მოუსმენ.

+ბონუსი — უბრალოდ მოდუნდი და ისიამოვნე

როგორც თავიდანვე ვთქვით, ყველაფერი ყოველთვის გეგმის მიხედვით არ მიდის, თუმცა ეცადე, ამან ხასიათი არ გაგიფუჭოს. Tbilisi Open Air-ის მთავარი მიზანი ხომ განტვირთვა და საუკეთესო მოგონებების შექმნაა, ამიტომ სჯობს ფესტივალზე იმ განწყობით მიხვიდე, რომ წინ დაუვიწყარი თავგადასავალი გელის!