ყველა დროის ერთ-ერთი ყველაზე პოპულარული ანიმაციური შოუ, ავატარი: ჰაერის უკანასკნელი მბრძანებელი, ნეტფლიქსზე სერიალის სახით ბრუნდება. სერიალი, რომელსაც წლებია, სულმოუთქმელად ველოდებით, 2024 წელს გამოვა. ახლა კი ნეტფლიქსმა რამდენიმე მთავარი პერსონაჟი გაგვაცნო.

ფოტო: Netflix

ფოტო: Netflix

აანგის როლს გორდონ კორმიე ასრულებს, კატარას როლს — კიავენტიიო, სოკას პერსონაჟს იენ ოუსლი განასახიერებს, ხოლო ზუკოს როლში დალას ლიუს ვიხილავთ.

ფოტო: Netflix

ფოტო: Netflix

უკვე რა ხანია, ცნობილია სხვა მთავარი პერსონაჟების როლის შემსრულებლებიც. აზულას როლს ელიზაბეთ იუ შეასრულებს, რაც შეეხება კიოშის მეომრების შეუპოვარ და უშიშარ ლიდერს, სუკის — სერიალში მის როლს მარია ჩჟანი მოირგებს. ცეცხლის მბრძანებელი ოზაის როლში კი, არც მეტი, არც ნაკლები, დაკარგულების მსახიობ დენიელ დაი კიმს ვიხილავთ.

ნეტფლიქსმა ფოტოებთან ერთად თიზერიც გაავრცელა, რომელშიც სხვადასხვა სტიქიის ელემენტების ტომების სიმბოლოებს ვხედავთ.

ავატარი: ჰაერის უკანასკნელი მბრძანებელი სამყაროზე მოგვითხრობს, რომელიც ოთხი სტიქიის ნიშნის მიხედვითაა დაყოფილი: წყალი, ცეცხლი, მიწა და ჰაერი. ცეცხლის ხალხის მიერ სხვათა დაპყრობის შემდეგ სამყაროში მშვიდობის დაბრუნება მხოლოდ განსაკუთრებულ ადამიანს, ავატარს, შეუძლია, რომელიც ოთხივე სტიქიას ფლობს. ახალ ავატარს, აანგს, წყლისტომელი და-ძმა, კატარა და სოკა, შემთხვევით აღმოაჩენენ და მას სხვებთან ერთად სამყაროს გადარჩენაში ეხმარებიან.

ავატარის ანიმაცია 2005 წელს გამოვიდა და მაყურებელთა სიყვარული მალევე მოიპოვა. სამსეზონიანი წარმატებული შოუს შემდეგ, ანიმაციური სერიალი ახალ ავატარ კორაზეც გადაიღეს.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…

ამავე თემაზე: