უკრაინის გენერალური პროკურორის მოადგილე, ევგენი ენინი ამბობს, რომ საქართველოს მესამე პრეზიდენტი, მიხეილ სააკაშვილი უკრაინის მოქალაქეა და საქართველოში ექსტრადირება შეუძლებელია. ენინის კომენტარს და კომენტარის თარგმანს ტელეკომპანია რუსთავი 2 ავრცელებს.

"ჩვენ სრული კონტაქტი გვაქვს ჩვენს ქართველ კოლეგებთან. გვაკავშირებს კარგი და ინტენსიური თანამშრომლობა, ჩვენ მივდივართ წინ და დრო გვიჩვენებს. სამ კვირაში პრეზიდენტი პოროშენკო საქართველოში ვიზიტით ჩამოსვლას აპირებს, დღის წესრიგი საკმაოდ კარგია და იმედი გვაქვს, რომ ის გააძლიერებს თანამშრომლობას არა მხოლოდ ძალოვან უწყებებს შორის, არამედ სოციალურ და ეკონომიკურ სფეროებშიც. არ ვიცი განიხილავენ თუ არა ექსტრადირების საკითხს, რადგან პრეზიდენტის ვიზიტის შინაარსი ჩემთვის ცნობილი არაა, მაგრამ მზად ვართ ჩვენი ქართველი კოლეგების მიერ დასმულ შეკითხვების ვუპასუხოთ," - განუცხადა ენინმა რუსთავი 2-ს.