ჯორჯიან უოთერ ენდ ფაუერი წერეთლის გამზირის სრული რეაბილიტაციის ფარგლებში, წყალმომარაგების ახალ ქსელზე მასშტაბურ სამუშაოებს ატარებს.

სარეაბილიტაციო პროექტის მიხედვით წერეთლის გამზირზე სრულად განახლდება წყალმომარაგებისა და წყალარინების ქსელი, რაშიც კომპანია 21 მლნ. ლარზე მეტის ინვესტიციას ახორციელებს.

"პროექტის ფარგლებში ახლით იცვლება 15,5 კმ-ზე მეტი სიგრძის მოძველებული მაგისტრალური და გამანაწილებელი ქსელები. წყალმომარაგების სტაბილურობისთვის ახალ ქსელზე 147 ევროსტანდარტის ჩამკეტ-მარეგულირებელი ურდული და 23 სახანძრო ჰიდრანტი დამონტაჟდება, ასევე მოეწყობა წყლის წნევის რეგულატორები და საკვანძო ჭები. ამ ეტაპისთვის წერეთლის გამზირზე უკვე განახლდა 4.8 კმ სიგრძის წყალსადენისა და 1.7 კმ სიგრძის წყალარინების ქსელი. წყალმომარაგების ქსელის განახლებული მონაკვეთის ექსპლუატაციაში შესვლის მიზნით, სამუშაოები დღეს, 7 ივნისს 14:00 საათზე დაიწყო. კომპანიის ტექნიკური ჯგუფები ბაგრატიონის ქუჩიდან დიდუბის ხიდამდე პარალელურად რამდენიმე მონაკვეთზე მუშაობენ და 35 წერტილზე გადაერთებით სამუშაოებს ჩაატარებენ", — აღნიშნავს ზურაბ ალფაიძე, ჯივიპის ტექნიკური დირექტორი.