მას შემდეგ, რაც პანდემია დასრულდა და პირბადეები ჩვენი ყოველდღიური ცხოვრების ნაწილი აღარ არის, იაპონელებმა ჰოლივუდურ ღიმილში ვარჯიში გადაწყვიტეს. უფრო მეტიც, ჰოლივუდურ ღიმილში სავარჯიშოდ იაპონიაში გაკვეთილებს ღიმილის ინსტრუქტორი ატარებს.

ჰიმავარი იოშიდა ერთ-ერთია იმ 20 სტუდენტიდან, რომელიც ფიქრობს, რომ ღიმილზე მუშაობა სჭირდება და ამისთვის გაკვეთილებსაც ესწრება. "COVID-19-ის პანდემიის დროს სახის კუნთებს თითქმის საერთოდ არ ვიყენებდი, ამიტომ ეს კარგი ვარჯიშია", — ამბობს იოშიდა.

ფოტო: Getty Images

იაპონიის ერთ-ერთ კომპანიას, რომელიც მსურველებს ჰოლივუდურ ღიმილში ავარჯიშებს, გაკვეთილებზე დასწრების მოთხოვნა შარშანდელთან შედარებით 4-ჯერ გაეზარდა. ერთსაათიანი გაკვეთილის ღირებულება, რომლის დროსაც ინსტრუქტორი სტუდენტებს ღიმილში ავარჯიშებს, დაახლოებით 55 აშშ დოლარი ღირს.

ერთ-ერთი ინსტრუქტორის თქმით, სტუდენტები სხვადასხვა პროფესიის წარმომადგენლები არიან. ხშირად თავად კომპანიების ინიციატივაა, რომ მათთან დასაქმებული ადამიანები ღიმილში გავარჯიშდნენ, რაც ძირითადად მარკეტინგის მიმართულებას ეხება. საგაკვეთილო პროცესის დროს კი ყველა მოსწავლეს სარკე უჭირავს, რათა საკუთარ ღიმილს დააკვირდეს და სამომავლოდ უკეთ გამოუვიდეს.