სერიალების ყურება უამრავი ჩვენგანისთვის დროის სასიამოვნოდ გატარებისა და დასვენების შეუდარებელი საშუალებაა. თანამედროვე სამყაროში მათ ნაკლებობას ნამდვილად არ ვუჩივით და სანახავ სერიალთა სიაში უცხოურთან ერთად ქართული ნამუშევრებიც ხვდება.

ამ სტატიაში ახალ ქართულ სერიალზე, ცვალებად ნიშნებზე, მოგიყვებით, რომელიც ზაფხულის ცხელი დღეების მრავალფეროვნად გატარებაში დაგეხმარება.

1. რა არის ცვალებადი ნიშნები?

ფოტო: Cavea+

ცვალებადი ნიშნები პირველი ქართული სტუდენტური სერიალია, რომელიც კავეა პლუსისა და ქართულ-ამერიკული უნივერსიტეტი გაუს თანამშრომლობით შეიქმნა. სერიალი ოთხი სტუდენტის შესახებ გვიყვება, რომლებიც ერთ სახლში გადავლენ საცხოვრებლად. სტუდენტური ცხოვრება, მეგობრობა, კონფლიქტები, მშობლებთან ურთიერთობა, სექსი, თავისუფლება — ეს იმ თემათა მცირე ჩამონათვალია, რომლებშიც მაყურებელი კომედიური და დრამატული ხაზებით იმოგზაურებს. თითოეული პერსონაჟი ტრანსფორმაციის გზას გაივლის და სერიალის სახელიც მათ ცვალებადობას გამოხატავს.

2. როგორ გაჩნდა სერიალის შექმნის იდეა?

ფოტო: Cavea+

ცვალებადი ნიშნები თავისუფალი სერიალია თავისუფალ სტუდენტებზე. მისი შექმნის იდეა კავეა პლუსში გაჩნდა, პროექტს კი მხარდამჭერის სახით ქართულ-ამერიკული უნივერსიტეტი გაუ გამოუჩნდა:

"კავეა პლუსის, პირველი ლეგალური სტრიმინგ პლატფორმის, გაშვების ერთ-ერთი მიზანი ყოველთვის ორიგინალი კონტენტის წარმოება იყო. თავიდანვე გვქონდა რამდენიმე სერიალის იდეა და ერთ-ერთი იყო სტუდენტური, ახალგაზრდული სერიალი. გვინდოდა ხარისხიანი, ფერადი, კომედიური და თან ცოტა თამამი ჟანრის სერიალი გადაგვეღო, რომელიც სხვადასხვა თაობისთვის აქტუალურ საკითხებსაც შეეხებოდა. ასევე, ზუსტად ვიცოდით, რომ დრამედიის ჟანრის სერიალი უნდა ყოფილიყო, რაც ასევე სიახლეა ჩვენი ინდუსტრიისთვის", — ამბობს სერიალის კრეატიული პროდიუსერი გვანცა გარმელია.

3. ვინ თამაშობს ცვალებად ნიშნებში?

ფოტო: Cavea+

სერიალში მონაწილეობენ ირაკლი კვირიკაძე, ნია გუგავა, გივიკო ბარათაშვილი, ბუკა თოლორდავა, ია ფარულავა, ნანკა კალატოზიშვილი, ანუკი ბუბუტეიშვილი, სანდრო სამხარაძე, ლაშა მებუკე, ნატალია ყიფშიძე, გიორგი მახარაძე და ა.შ. აღსანიშნავია, რომ ირაკლი კვირიკაძე საქართველოში აშშ-დან სპეციალურად სერიალისთვის ჩამოვიდა.

4. ვინ ქმნის ცვალებად ნიშნებს?

ფოტო: Cavea+

ფოტო: Cavea+

ცვალებადი ნიშნების რეჟისორი სოსო ბლიაძეა, რომლის ცნობილ ნამუშევრებს შორისაა ჩემი ოთახი და ოთარის სიკვდილი. სერიალის სცენარისტები ბექა ადამაშვილი და მარიამ გურგენიშვილი არიან. ბექა ადამაშვილის წიგნებს ბესტსელერი და ამ რომანში ყველა კვდება ქართველი მკითხველი კარგად იცნობს. მარიამ გურგენიშვილი კი მარგალიტების ავტორია.

5. როდის გამოვა სერიალი?

ფოტო: Cavea+

სერიალის პრემიერა 15 ივნისს კავეა პლუსზეა დაგეგმილი. ცვალებადი ნიშნების პირველი სეზონი 12 ეპიზოდისგან შედგება და მაყურებელი კვირაში თითო ეპიზოდს ნახავს.

მოკლედ, ისღა დაგვრჩენია, 8 ივნისს ახალ თინეიჯერულ სერიალს ჩავუსხდეთ და პერსონაჟების ყოველდღიურ ცხოვრებაში გადავეშვათ.