რატომ არის მნიშვნელოვანი: 30 მაისს პრემიერმინისტრი ბრატისლავაში გლობალური უსაფრთხოების სამიტზე ჩავიდა, სადაც 2008 წლის ომზე, რუსეთის უკრაინაში შეჭრაზე, კანდიდატის სტატუსზე, რუსეთთან ეკონომიკურ ურთიერთობაზე, პოლარიზაციასა და ივანიშვილზეც კი ისაუბრა.

  • ირაკლი ღარიბაშვილმა საერთაშორისო ტრიბუნიდანაც ქართული ოცნების და ნაწილობრივ კრემლის მესიჯბოქსები გააჟღერა.
  • კითხვაზე იყო თუ არა აგვისტოს ომი არაპროვოცირებული აგრესია — თქვა, რომ დეტალებზე საუბარი არ სურს.
  • ამის შემდეგ კი რუსეთის არაპროვოცირებული, სრულმასშტაბიანი აგრესია უკრაინის წინააღმდეგ ქვეყნის NATO-ში გაწევრიანების სურვილს მიაწერა.
  • პრემიერის განცხადებები მსოფლიო მედიის ყურადღების ცენტრში მოექცა და როგორც ადგილობრივ, ისე საერთაშორისო დონეზე კრიტიკის საგანი გახდა.
  • მათ შორის, იყო NDI-ის საქართველოს ოფისის ყოფილი დირექტორი, ლორა თორნტონიც, რომელმაც დაწერა, რომ ქართული ოცნება კრემლის ორბიტაზე დასახლდა და ეს ტრაგიკულია.
  • კონსტრუქციულ კრიტიკაზე პასუხად თორნტონმა თავდასხმა და კობახიძის შეურაცხმყოფელი ტერმინოლოგია მიიღო.

რა თქვა კობახიძემ: კობახიძემ განაცხადა, რომ ვნებათაღელვა, რომელიც პრემიერის "სრულიად უწყინარ და ლოგიკურ განცხადებას" მოჰყვა აბსურდული იყო.

  • მისი აზრით, "გლობალურმა ომის პარტიამ" ანუ ოპოზიციამ, ღარიბაშვილის წინააღმდეგ კამპანიაში ჩართო "აბსოლუტურად ყველა აგენტი".
  • "გამოაგორეს ძველი, ნაფტალინიდან ამოღებული აგენტები, ახალი აგენტები, გამოაგორეს სცენაზე. ლორა თორტონი საერთოდ არ გვახსოვდა და უცებ გამოაგორეს. NDI-ის ყოფილი ხელმძღვანელი, საერთოდ არ ახსოვდა არავის და უცბად ესეც კი გამოაგორეს სცენაზე", — განაცხადა მან.

რას პასუხობს თორნტონი: ტვიტერზე გამოქვეყნებულ პოსტში თორნტონმა აღნიშნა, რომ ქართული ოცნების ხელმძღვანელმა "დაობებული" და "ნაფტალინიდან" ამოღებული უწოდა, როგორც ყველა პროფესიონალ სახელმწიფო მოღვაწეს.

  • "ქალის გარეგნობის შეურაცხყოფაზე უკეთესი ფორმით თავის დაცვა არ შეგიძლიათ. მე შეიძლება ძველი, მახინჯი ნაფტალინი ვარ, მაგრამ ჩემი მორალური კომპასი მაინც მაქვს. დიდება უკრაინას". — დაწერა თორნტონმა.