ამის შესახებ ინფორმაციას Reuters ავრცელებს.

რატომ არის მნიშვნელოვანი: 2022 წლის მარტში ცნობილი გახდა, რომ ქართული ოცნების დამფუძნებელმა, ბიძინა ივანიშვილმა შვეიცარიულ ბანკს Credit Suisse-ს ბერმუდის სასამართლოში $600-მილიონიანი დავა მოუგო.

  • სასამართლო გადაწყვეტილების შედეგად, ბანკს ივანიშვილისთვის თანხის ანაზღაურება დაეკისრა. ივანიშვილი ჩიოდა თანხის გადაცემის შეფერხებაზე.
  • ბანკმა თანხის გადარიცხვის შეფერხება აღმოსავლეთ ევროპაში არსებული გეოპოლიტიკური გარემოთი ახსნა, შემდეგ კი ივანიშვილს ევროპარლამენტის რეზოლუციაზე კითხვები გაუგზავნა.
  • გარდა ამისა, საქმე სინგაპურის სასამართლოშიც მიმდინარეობდა.

დეტალები: საქმე ეხება თაღლითურ ტრანზაქციებს, რომლებშიც Credit Suisse-ის სინგაპურის ოფისიც იყო ჩართული.

  • ივანიშვილი დავობდა, რომ ეს ტრანზაქციები მისმა ყოფილმა პირადმა ბანკირმა, პატრიკ ლესკადრონმა ავტორიზაციის გარეშე განახორციელა, რითაც ოლიგარქის ქონებას მრავალმილიონიანი ზარალი მიადგა.
  • კომპენსაცია, რომელიც Credit Suisse-მა ივანიშვილს უნდა გადაუხადოს მოიცავს არა მხოლოდ პირადი ბანკირის თაღლითობით დაკარგულ თანხებს, არამედ იმ შემოსავალსაც, რომელსაც ყოფილი პრემიერმინისტრი აქტივების პირნათლად მართვის შემთხვევაში მიიღებდა.