ამის შესახებ ქართული ოცნების თავმჯდომარემ მედიასთან ისაუბრა.

რატომ არის მნიშვნელოვანი: კობახიძე, ასევე, ანტისახელმწიფოებრივ სპეკულაციას უწოდებს პროტესტს, რომელიც პარლამენტის გაფორმებიდან ევროკავშირის დროშების ამოღებას მოჰყვა.

  • გუშინ, 24 მაისს სოციალურ ქსელში გავრცელდა ფოტო, რომელზეც 2022 და 2023 წლის 26 მაისს პარლამენტის გაფორმებაა შედარებული.
  • 2022 წლის ფოტოში ჩანს, რომ საკანონმდებლო ორგანოს წინ საქართველოს დროშებთან ერთად ევროკავშირის დროშაც იყო დამაგრებული, წელს კი აღარ არის.
  • იმის ფონზე, როცა ქვეყანა კანდიდატის სტატუსის მოლოდინშია და სამთავრობო გუნდისგან ანტიდასავლური განცხადებები ისმის, გაფორმებიდან ევროკავშირის დროშის ამოღება კრიტიკის საგანი გახდა.

დეტალები: კობახიძე გაფორმებიდან ევროკავშირის დროშის ამოღებას იმით ხსნის, რომ 26 მაისი ეროვნული დამოუკიდებლობის დღეა და ის "თავიდან ბოლომდე ეროვნულ სიმბოლიკაზე უნდა იყოს აგებული".

  • "ერთადერთი გამონაკლისი იყო შარშანდელი წელი, რაც უკავშირდებოდა იმას, რომ ჩვენ ერთი თვით ადრე შვიტანეთ განაცხადი კანდიდატის სტატუსზე. არც მანამდე წინა ხელისუფლების დროს, არც მომდევნო წლებში, არასდროს სხვა ელემენტი არ იყო".
  • ამის შემდეგ, საუბრობს ადამიანებზე, რომლებსაც ფეისბუქზე ე.წ. ჩარჩოდ უკრაინისა და EU-ს დროშები უყენიათ და მათ უსამშობლოებს უწოდებს.
  • ამტკიცებს, რომ ისინი "ნაციონალები, ფსევდოლიბერალები, ან მათზე აყოლილი ჩვეულებრივი მოქალაქეები" არიან.
  • "არავითარი საქართველო, არავითარი საქართველოს დროშა. ეს არის მათი დამოკიდებულება, ესინი არიან უსამშობლო ადამიანები", — ამბობს კობახიძე.