რატომ აღარ არის პარლამენტის გაფორმებაში ევროკავშირის დროშა

რატომ არის მნიშვნელოვანი: დღეს სოციალურ ქსელში გავრცელდა ფოტო, რომელზეც 2022 და 2023 წლის 26 მაისს პარლამენტის გაფორმებაა შედარებული.

2022 წლის ფოტოში ჩანს, რომ საკანონმდებლო ორგანოს წინ საქართველოს დროშებთან ერთად ევროკავშირის დროშაც იყო დამაგრებული, წელს კი აღარ არის.
იმის ფონზე, როცა ქვეყანა კანდიდატის სტატუსის მოლოდინშია და სამთავრობო გუნდისგან ანტიდასავლური განცხადებები ისმის, გაფორმებიდან ევროკავშირის დროშის ამოღება კრიტიკის საგანი გახდა.
გარდა ამისა, როგორც მოზაიკა წერს, წინა წლისგან განსხვავებით, გორის მერიის წლევანდელ პროგრამაში ევროკავშირის ჰიმნი აღარ არის.

**პარლამენტის გაფორმებები დამოუკიდებლობის დღისთვის**

დეტალები: On.ge-მ მთავრობას მიმართა კითხვით, რატომ არ არის პარლამენტის წინ EU-ს დროშა. პრესსამსახურში ამბობენ, რომ თემატიკა ყოველწლიურად იცვლება, შესაბამისად იცვლება გაფორმებებიც.

"2016 წლიდან, ყოველ წელს, ეს დღე იძენს დამატებით თემატიკას, რის გარშემოც იშლება კამპანია, სლოგანი, მისალოცი რგოლი, ქალაქ-გაფორმება. წელს 26 მაისის გზავნილია — "თავისუფლების სიყვარულით". დედაქალაქისა და მთელი საქართველოს გარე -გაფორმება მოხდა ეროვნული სიმბოლიკით", — აცხადებენ მთავრობაში.
მათივე განმარტებით, შარშანდელი თემა იყო "ევროპისკენ" და გაფორმებაც შესაბამისი იყო, 2017 წელი კი მთლიანად რუსთაველის 850 წლის იუბილეს მიეძღვნა თემით "მე რუსთაველის ქვეყნიდან ვარ" და ქალაქიც ამ თემატიკით გააფორმეს.
საარქივო ფოტოებში ჩანს, რომ 2017 წელს პარლამენტზე ვეფხისტყაოსნის ილუსტრაციები იყო, 2018-ში — 100 წლისთავის აღსანიშნი პოსტერები.
2019-ში, ისევე როგორც 2020 წელს, საკანონმდებლო ორგანოს შენობა არ გაუფორმებიათ.

ბოლო ამბები:

გირჩევთ