ბაქოში დაკავებული აზერბაიჯანელი ჟურნალისტის, აფგან მუხტარლის ცოლი აცხადებს, რომ მისი ქმრის ჯამრთელობის მდგომარეობა დამძიმდა, თუმცა საავადმყოფოში მაინც არ გადაჰყავთ:

"იგი არ უნდა იყოს ციხეში. ექიმის გასინჯვის შემდეგ, მას დანიშნული მედიკამენტებიც კი არ მიაწოდეს და ვფიქრობ, რომ არც საავადმყოფოში არ გადაიყვანენ. მათ უბრალოდ უნდათ, რაც შეიძლება მეტი ფიზიკური ზიანი მიაყენონ მას".

რამდენიმე დღის წინ, რაიონულმა სასამართლომ აფგან მუხტარლის შინაპატიმრობაზე უარი უთხრა.

ბრალდების მხარის წარმომადგენელმა, ჰასან ნაგიევმა განაცხადა, რომ თუკი მუხტარლის ციხიდან გაუშვებენ, არსებობს მისი ქვეყნიდან გაქცევის საფრთხე.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.