ამის შესახებ პენტაგონის სპიკერმა, პატ რაიდერმა ბრიფინგზე ისაუბრა.

დეტალები: რუსეთის თავდაცვის სამინისტრომ გამოაქვეყნა კადრები, თითქოს ბელგოროდზე თავდასხმისთვის პროუკრაინული ჯგუფები ამერიკული წარმოების ტექნიკას იყენებენ.

  • კერძოდ, კადრებში ჩანს მიტოვებული და დაზიანებული დასავლური სამხედრო მანქანები, მათ შორის, ამერიკული Humvee.
  • პენტაგონი განმარტავს, რომ აშშ-ის მთავრობას მესამე მხარისთვის, გასამხედროებული ორგნიზაციისთვის იარაღის გაცემის ნებართვა არ გაუცია და მონიტორინგს აგრძელებენ.
  • მისივე თქმით, არც უკრაინას მოუთხოვია ასეთი რამ.
  • გუშინ რუსეთის თავისუფლების ლეგიონმა კიდევ ერთი მტკიცება უარყო, რომ მათ ბელგოროდში დივერსანტების 70-კაციანი ჯგუფი გაანადგურეს.

რა მოხდა: 22 მაისს რუსეთის მოხალისეთა კორპუსის მებრძოლებმა ბრიანსკისა და ბელგოროდის ოლქებიდან ვიდეო გამოაქვეყნეს, სადაც აცხადებდნენ, რომ რუსეთის საზღვარი გადაკვეთეს და "მალე ქვეყანა თავისუფალი იქნება".

  • უკრაინის მხარეს მებრძოლმა რუსეთის თავისუფლების ლეგიონმა კი ვიდეო ჩაწერა, რომლითაც თანამოქალაქეებს მოუწოდა, იბრძოლონ პუტინისგან ქვეყნის გასათავისუფლებლად.
  • ასევე, ლეგიონის წევრებმა რუსეთის საზღვრისპირა მაცხოვრებლებს მიმართეს, დარჩნენ სახლში და მათ წინააღმდეგობა არ გაუწიონ.
  • პარალელურად, ვრცელდებოდა ადგილობრივების კადრები, რომლებიც ბელგოროდში აფეთქებებსა და სირენების ხმას ასახავდა.
  • მოგვიანებით ლეგიონმა ბელგოროდის ოლქის რამდენიმე დასახლების გათავისუფლებაზე განაცხადა.
  • გავრცელდა ფოტოებიც, სადაც ხიდზე გაფენილი "თავისუფალი რუსეთის" ალტერნატიული დროშა ჩანს, რომელზეც წითელი ფერი არ არის.
  • მებრძოლების მიზანი რუსეთის საზღვარზე დემილიტარიზებული ზონის შექმნაა, საიდანაც ოკუპანტები უკრაინას ვეღარ დაბომბავენ.

რატომ არის მნიშვნელოვანი: ბელგოროდში მიმდინარე მოვლენებმა რუსეთში პანიკა და სრული გაურკვევლობა გამოიწვია — ბელგოროდის მაცხოვრებლები ბომბსაცავების არარსებობაზე ჩივიან.

  • აგრესორი ქვეყანა, რომელიც სხვის ტერიტორიაზე აწარმოებდა საბრძოლო მოქმედებებს, ახლა ძალებს ბელოგორდისკენ გზავნის და ამ რეგიონს უწოდებს "სპეციალური სამხედრო ოპერაციის ზონას".
  • ინტერნეტმომხმარებლები ხუმრობენ, რომ მალე რუსეთს ბელგოროდის სახალხო რესპუბლიკა გამოეყოფა.
  • რა თქმა უნდა, რუსეთმა მომხდარში "უკრაინის შეიარაღებული ძალების სადაზვერვო-დივერსიული ჯგუფი" დაადანაშაულა, თუმცა უკრაინის დაზვერვამ ბრალდებები უარყო.
  • ვლადიმერ პუტინის პრესსპიკერი ამტკიცებდა, თითქოს დივერსიის მიზანი იყო "ბახმუტის მიმართულებიდან ყურადღების გადატანა, უკრაინული მხარის მიერ არტემოვსკის დაკარგვის პოლიტიკური ეფექტის მინიმუმამდე შემცირება".
  • უკრაინის პრეზიდენტის ადმინისტრაციის უფროსმა მრჩეველმა დაწერა, რომ მომხდართან პირდაპირი კავშირი არ აქვთ, მაგრამ ინტერესით ადევნებენ თვალს მიმდინარე მოვლენებს.