ტერმინი სარკოპენია ასაკის მატებასთან ერთად კუნთების მასის პროგრესირებად და დაჩქარებულ დაკარგვას გულისხმობს და იგი 1980-იან წლებში შემოიღეს. თუმცა, მიუხედავად იმისა, რომ სიბერის ფონზე დასუსტება ახალი ფენომენი არ არის, სარკოპენია დაავადებად, სულ რაღაც, ბოლო წლებში ცნეს.

და მაინც, სარკოპენია ბუნებრივია, მაგრამ, როგორც კვლევები გვიჩვენებს, კუნთების ზრდა და დაავადებასთან ბრძოლა გვიანი არასდროსაა.

კუნთების თანდათანობით დაკარგვას 30 წელს გადაცილებული ყველა ადამიანი განიცდის, მაგრამ ეს პროცესი შემდეგ წლებში კიდევ უფრო ჩქარდება.

სარკოპენია ზრდის მოტეხილობების, ჰოსპიტალიზაციის, დამოუკიდებლობის დაკარგვისა და მრავალი სხვა ქრონიკული დაავადების რისკს.

თუმცა, ადამიანებს, რომლებიც აქტიურები არიან ადრეულ ასაკში და ინარჩუნებენ ჯანსაღ ჩვევებს ასაკთან ერთად, შეუძლიათ, შეაჩერონ ან თავიდან აიცილონ სარკოპენიის დაწყება.

კარგი ამბავი კი ის არის, რომ, იმ შემთხვევაშიც კი, თუკი ინდივიდი სარკოპენიის ეფექტებს უკვე განიცდის, მისი შეჩერება ვარჯიშის საშუალებით გვიანი არასდროსაა.

რას ამბობს მეცნიერება

ამტანობის ვარჯიშები — წონების აწევა, ჩაჯდომები, აზიდვები და სხვ. — როგორც ჩანს, ყველაზე ეფექტიანი გზაა კუნთების გასაზრდელად და გასაძლიერებლად.

კლინიკურმა კვლევებმა თანმიმდევრულად აჩვენა, რომ ყველა ზრდასრულ ადამიანს — 75 წელზე უფროსი ასაკის ძალიან სუსტ ინდივიდებსაც კი — შეუძლია, მნიშვნელოვნად გაზარდოს კუნთების მასა და ძალა ამტანობის ვარჯიშებით კვირაში, სულ მცირე, 2-ჯერ. გაუმჯობესება შეინიშნება, სულ რაღაც, რვა კვირის განმავლობაში.

ერთი ძირითადი კვლევა მოიცავდა 10 სუსტ, ჰოსპიტალიზებულ 86-96 წლის ავადმყოფს, რომლებსაც ჩაუტარდათ მაღალი ინტენსივობის ამტანობის ვარჯიშის პროგრამა.

სულ რაღაც, რვა კვირის შემდეგ, ბარძაყის კუნთის ფართობი გაიზარდა, თითქმის, 10%-ით (რაც უდრის ათწლეულის განმავლობაში დაკარგული კუნთების ოდენობას), ხოლო ფეხის ძალა — დაახლოებით, 180%-ით. სხვა სიტყვებით რომ ვთქვათ, ეს ხანდაზმული ადამიანები, თითქმის, სამჯერ უფრო ძლიერები გახდნენ მოკლე სასწავლო პროგრამის ბოლოს.

აღსანიშნავია ისიც, რომ ბევრი ხანდაზმული ადამიანი განიცდის ჭარბწონიანობას, რაც ზრდის გულსისხლძარღვთა დაავადებებისა და მე-2 ტიპის დიაბეტის რისკს. ამ დროს ექიმები მათ ურჩევენ დიეტის დაცვას, მაგრამ ამას კუნთების მასის შემცირება მოჰყვება, რაც ასევე არასახარბიელოა. კუნთების მასის დაკარგვის შედეგების მინიმიზებისთვის, სწორედ ამტანობის ვარჯიშებია საჭირო.

აქედან გამომდინარე, იმისდა მიუხედავად, თუ რა ასაკში ხართ, რეკომენდებულია, კვირაში, სულ მცირე, 2-ჯერ შეასრულოთ ამტანობის ვარჯიშები. ამ გზით შეძლებთ ჯანსაღი სხეულის შენარჩუნებას და თავიდან აირიდებთ სარკოპენიის პრობლემას.