ამის შესახებ ქართული ოცნების დეპუტატმა იმედის ეთერში ისაუბრა.

რატომ არის მნიშვნელოვანი: ლავროვის სიძის, ალექსანდრ ვინოკუროვის ძმა, მიკა ვინო, იგივე მოშე ვინოკუროვი კახეთში, ყვარელში ქორწილს გადახდას აპირებდნენ.

  • სოციალურ ქსელში გამოქვეყნებულ კადრებში ჩანდა, რომ წყვილმა ხელი თბილისში მოაწერა, რის შემდეგაც წვეულება რესტორანში გამართეს.
  • მთავარი არხის ჟურნალისტი Kvareli Lake Resort-ს ტელეფონით დაუკავშირდა და ყვავილების მაღაზიის წარმომადგენლად გაეცნო, რომელსაც ლავროვასთვის თაიგული უნდა მიეტანა.
  • დილიდან ყვარელში სასტუმროსთან დილიდან საპროტესტო აქცია იმართებოდა, სადაც შეკრებილები სანქცირებული ლავროვის ოჯახის წევრების იქ ყოფნასა და დაგეგმილ ქორწილს აპროტესტებდნენ.
  • აქციაზე 20-მდე აქტივისტი, მათ შორის, დროას ლიდერი, ელენე ხოშტარია დააკავეს.
  • არასამთავრობო ორგანიზაციები აღნიშნავენ, რომ პოლიცია არაპროპორციულ ძალას იყენებდა.
  • გარდა ამისა, ადვოკატებს არ ეძლევათ შესაძლებლობა, დაკავებული აქტივისტები მოინახულონ.

ვოლსკი იმედის ეთერში ამბობს, რომ ლავროვის შვილის საქართველოში ჩამოსვლის შესახებ მოგვიანებით გაიგო, რადგან ის ქმრის გვარზეა და ვინოკუროვაა.

  • დეპუტატი ლავროვის საქართველოში ჩამოსულ ნათესავებს "საკმაოდ მოაზროვნე ხალხს" უწოდებს და არგუმენტად მათი "ანტირუსული განცხადებები" მოჰყავს.
  • "ქმრის ძმა საკმაოდ ისეთი ანტირუსული განცხადებებით არის ცნობილი, მათ შორის, ფეისბუქზე და მათ შორის ისეთი პოზიტიური კომენტარები ჰქონია უკრაინისგან. "არა ომს", "არა უკრაინაზე თავდასხმას" და ა.შ. მთლად რადიკალური განცხადებები არ არის — "ძირს პუტინი", მაგრამ, ყოველ შემთხვევაში, საკმაოდ თავისუფლად მოაზროვნე ხალხია", — ამბობს ის.

დეტალები: როგორც დეპუტატი ამბობს, ლავროვის შვილი აშშ-ში ცხოვრობდა და "მგონი ამერიკული პასპორტიც აქვს".

  • შემდეგ კი საუბრობს იმაზე, რომ "ცოტა სუსტად გამოვიყურებით", როცა მამისთვის შვილს ვთხოვთ პასუხს.
  • გარდა ამისა, ვოლსკის თქმით, ლავროვი, მათ შორის, საქართველოს ხელმოწერით გაირიცხა ევროპული სტრუქტურებიდან, თუმცა ჟურნალისტის რეპლიკაზე, რომ გაუგებარია სანქცირებული ადამიანების შემოსვლა, ვოლსკი ამბობს:
  • "მერე რატომ მეკამათებით, ვერ გავიგე, მე ვყვები რეალობას, რაც არის [...] ხო, ცუდია, არ მომოწნს, არ უნდა ჩამოვიდეს ლავროვის შვილი აქ, მოხდა ხო?"
  • "არ უნდა ჩამოვიდეს პოზნერი, არ უნდა ჩამოსულიყო მიხალკოვი, რომელსაც ეახლა და ქედმოხრით ელაპარაკა სააკაშვილი. მაგრამ პოზნერს, 90 წლის კაცს, ან ამ ქალს თუნდაც ქორწილში ჩოხით რომ გაეკიდები, მთლად ის არ არის ის რეალობა, რაც უნდა აისახოს".