ზურა გომელაური თანამედროვე ქართული მხატვრობის ერთ-ერთი გამორჩეული წარმომადგენელია. მისი ნახატები სავსეა სითბოთი, სიყვარულითა და საოცარი განწყობით, რომელსაც მხატვარი თითოეულ ნამუშევარში დებს. ზურა გომელაურის შემოქმედება პოპულარულია არა მხოლოდ საქართველოში, არამედ ჩვენი ქვეყნის ფარგლებს გარეთაც. რამდენიმე დღეში ქართული საზოგადოება კიდევ ერთხელ შეძლებს, დატკბეს ხელოვანის ნამუშევრებით. 20-დან 23 მაისამდე, PSP-ს მხარდაჭერით, თბილისის ღვინის მუზეუმი ზურა გომელაურის გამოფენას — სიცოცხლის ხე უმასპინძლებს.

გამოფენის სახელწოდება მხატვრის ერთ-ერთი გამორჩეული ტილოდან მოდის, რაც მის შემოქმედებას ერთგვარ ლაიტმოტივად გასდევს. გამოფენაზე ზურა გომელაური 30-ზე მეტ ახალ ნამუშევარს წარადგენს. ასევე, წარმოდგენილი იქნება სიცოცხლის ხის ორიგინალი ნამუშევარი და მის მიხედვით შექმნილი მანათობელი ინსტალაციები.

"მე მიყვარს ეს თემა. სიცოცხლის ხე უწმინდესსაც ძალიან მოსწონს. ეს სიხარულის და სურვილების ასრულების ხეა. გამოფენაზე ქორწილის, ბავშვების, ცხოველების და სიცოცხლესთან დაკავშირებული სხვადასხვა ქართული თემატიკა იქნება წარმოდგენილი. ყველა ეს ნამუშევარი ერთ საერთო კონცეფციაში ერთიანდება", — აღნიშნავს ზურა გომელაური.

დაახლოებით, 5 წლის იყო, ხატვა რომ დაიწყო. მერე მშობლებმა პიონერთა სასახლეში მიიყვანეს. იქ 12 წლისას პირველი პერსონალური გამოფენაც ჰქონდა. ასე გაგრძელდა ყველაფერი და მას შემდეგ საყვარელ საქმეს აღარ ჩამოშორებია.

ზურა გომელაური მხოლოდ შემოქმედებით გამორჩეული მხატვარი არ არის. ის მისი დამოკიდებულებებითა და ადამიანური ღირებულებებით გამოირჩევა. უყვარს ადამიანებისთვის ნახატების ჩუქება და არ ესმის იმ მხატვრების, ვისაც ეს პროცესი სიამოვნებას არ ანიჭებს.

"ბევრი ადამიანი მოდის ჩემთან ნახატების შესაძენად. მე არ მიყვარს მძიმე ნამუშევრები, სადაც დეპრესიაა. საერთოდაც, ვთვლი, რომ ხელოვნებამ კი არ უნდა დასტრესოს ადამიანი, არამედ ოცნებებში წაიყვანოს. ნახატების გაჩუქებაც ძალიან მიყვარს. მიხარია, როცა ვინმეს მოსწონს და კედელზე კიდებს. ხელოვნების დანიშნულებაც ეს არის — ის ადამიანთან უნდა მივიდეს. ამიტომ, მიკვირს, როცა მხატვრები ამბობენ, რომ საკუთარი ნამუშევრის სხვისთვის ჩუქების შემდეგ ნერვიულობენ და ამის გაკეთება არ უყვართ", — დასძენს მხატვარი.

ზურას მხატვრობის სიყვარული ბავშვობიდანვე ჰქონდა. მისი მამიდის მეუღლე ცნობილი მხატვარი რენო თურქია იყო. ზურა ხშირად მიდიოდა მის სახელოსნოში, უყურებდა საღებავებს და ნახატებს, რომლებიც მასზე მნიშვნელოვან გავლენას ახდენდა. იქიდანაც ხშირად მოდიოდა საღებავებითა და პასტელებით ხელდამშვენებული, რომელსაც ცნობილი მხატვარი მომავალ ცნობილ მხატვარს ჩუქნიდა. ალბათ, ამ პერიოდმა განსაზღვრა ზურას მომავალი.

"ხატვა ყოველთვის მინდოდა. ახლაც ასე ვარ. ვცდილობ, ლამაზი განწყობა შევუქმნა ადამიანებს. ჩემი შემოქმედება, ალბათ, რომანტიკული მხატვრობაა, რადგან სულ ქორწილებს, მეოცნებეებს და სიცოცხლის ხეებს ვხატავ. მთავარია, გარშემო სიმშვიდეს ვგრძნობდე და ცუდად არავინ იყოს. შემიძლია, ერთ ნახატზე ერთი კვირაც კი ვიმუშაო. როგორი ხასიათითაც ხატავ, ნახატიც ისეთი გამოდის. ხატვისას რომ ვინმემ შემომხედოს, სულელი ვეგონები. ნახატს ვუღიმი... მინდა, რომ ვის სახლშიც შევა, სიკეთე შეიტანოს. ნახატს აურის შეცვლა შეუძლია. მგონია, რომ ჩემი ნამუშევრები მისალოცი ბარათებივითაა — კეთილი სურვილების ნაკრები", — ამბობს მხატვარი.

გარდა იმისა, რომ ზურა შესანიშნავი მხატვარი და ადამიანია, ის არაჩვეულებრივი მამაც გახლავთ. შვილთან, სალომესთან ერთად, ის დღემდე დადის სახლისთვის საყიდლებზე და დღემდე ცდილობს, უკვე შემდგარ პროფესიონალს, პროფესიულ განვითარებაში დაეხმაროს.

სალომე ბაშვობიდანვე ფერად სამყაროში იზრდებოდა. ზურას პერსონამ მნიშვნელოვნად განაპირობა ის, რომ ხელოვნების სფეროში წავიდა და ტანსაცმლის დიზაინი აირჩია.

"ზურა არაჩვეულებრივი მამაა, ძალიან მზრუნველი და ყურადღებიანია. ბავშვობაში, როცა გავცივდებოდი და რაიმე ვირუსი შემხვდებოდა, იმდენად ნერვიულობდა, რომ ვეღარ ხატავდა. სურპრიზებით სავსე ბავშვობა მქონდა. ის დღესაც ასეთია. ერთად დავდივართ აქსესუარების და ავეჯის საყიდლად სახლისათვის თუ აგარაკისთვის... ერთნაირი გემოვნება გვაქვს. ჩემს შემოქმედებით განვითარებაში ყოველთვის ძალიან აქტიურად იყო ჩართული. ის იყო ჩემი სტიმული, რათა უფრო უფრო მეტი გამოფენა მომეწყო. ზურა გამორჩეული ხელოვანია. მას რომც არ ვიცნობდე, ამ მხატვრით აუცილებლად დავინტერესდებოდი. ის არა მარტო საქართველოში, არამედ საზღვარგარეთაც პოპულარულია. მიმაჩნია, რომ მსოფლიო დონის მხატვარია. როგორი პოზიტიური და სიყვარულით სავსე ადამიანიცაა, ზუსტად ისეთია მისი ნამუშევრებიც", — აღნიშნავს სალომე გომელაური.

20-დან 23 მაისის ჩათვლით, საზოგადოებას კიდევ ერთხელ მიეცემა შესაძლებლობა, დატკბეს გამორჩეული თანამედროვე მხატვრის ზურა გომელაურის ნამუშევრებით და ისიამოვნოს იმ გარემოთი, რომელიც 17:00 საათიდან თბილისის ერთ-ერთ უძველეს, გამორჩეულ და ისტორიულ საგანძურში, თბილისის ღვინის მუზეუმში მისულებს დახვდებათ.