ლონდონის საცხოვრებელ სახლში ხანძრის გაჩენის მიზეზი Hotpoint-ის მაცივრის საყინულე გახდა. ინფორმაციას პოლიციაზე დაყრდნობით BBC ავრცელებს.

ოფიციალური ცნობით, საყინულის გარშემო არსებული საფარი მწყობრიდან გამოვიდა და ხანძრის გავრცელების მიზეზი ეს გახდა.

გრენფილ თაუერში გაჩენილი ხანძრის შედეგად დაკარგულად ან დაღუპულად ამ დროისთვის 79 ადამიანი მიიჩნევა. პოლიცია შიშობს, რომ ეს რიცხვი შესაძლოა კვლავ გაიზარდოს.

ლონდონში ხანძრის შედეგად დაღუპულთა ძებნას, სავარაუდოდ, რამდენიმე კვირა დასჭირდება. 13 ივნისს, 24 სართულიან შენობაში ხანძარი გაჩნდა. ადგილზე 200 მეხანძრე მუშაობდა.

გრენფილ თაუერს ცეცხლი შუაღამისას მოედო, როდესაც შენობაში მცხოვრებ ადამიანთა უმრავლესობას ეძინა.

პოლიციის განცხადებით, შესაძლოა შენობაში აღმოჩენილი ნეშტებიდან ყველას იდენტიფიცირება ვერ მოხდეს და სამუშაოებს მრავალი კვირა დასჭირდება.