ამის შესახებ კახა კალაძემ თბილისის მთავრობის სხდომაზე განაცხადა.

რატომ არის მნიშვნელოვანი: აპლიკაციის საშუალებით მოქალაქეები თბილისში ინფრასტრუქტურის დაზიანების შესახებ მუნიციპალიტეტის ინფორმირებას შეძლებენ.

  • თბილისის მერის თქმით, აპლიკაცია უნდა ამოქმედებულიყო პირველი მაისიდან, თუმცა Google play store-ისა და App store-ის ვერიფიკაციის პროცესის გამო, რასაც გარკვეული დრო დასჭირდა, აპლიკაცია 15 მაისიდან ამოქმედდება.
  • მისივე თქმით, მანამდე გაიმართება პრეზენტაცია, სადაც აღნიშნული სიახლის შესახებ საზოგადოება კიდევ უფრო დეტალურ ინფორმაციას მიიღებს.
  • აპლიკაცია რომელიც მუნიციპალური სერვისების განვითარების სააგენტომ შექმნა.

დეტალები: კალაძის თქმით, ეს არის მუნიციპალიტეტსა და მოქალაქეს შორის სპეციფიკური კომუნიკაციის საშუალება, რომლის მიზანია, მუნიციპალიტეტის ინფორმირება დედაქალაქში ინფრასტრუქტურის დაზიანების შესახებ.

  • "დღეს მოქალაქე ან ცხელ ხაზზე რეკავს, ან ფეისბუქზე გვაწვდის ინფორმაციას. ხშირად პირადად მეც მიგზავნიან ინფორმაციას აღნიშნულთან დაკავშირებით. ეს შეიძლება იყოს სკვერში რაიმეს დაზიანება, ან ატრაქციონი იყოს მოსაწესრიგებელი, დაზიანებული იყოს საგზაო ინფრასტრუქტურა, განათება და ასე შემდეგ", — თქვა თბილისის მერმა.
  • ამბობს, რომ აპლიკაციის შექმნა კომუნიკაციის გამარტივებისა და პრობლემის მოგვარების გზებს ამარტივებს.
  • აცხადებს, რომ აქვთ დიდი მოტივაცია, რომ იყვნენ ძალიან სწრაფები აღნიშნული პრობლემების მოგვარებაში.

როგორ იმუშავებს აპლიკაცია: თბილისის მერის განცხადებით, აპლიკაციის მუშაობის პრინციპი მარტივია.

  • ამბობს, რომ თუ მოქალაქე სადმე დაინახავს დაზიანებულ ინფრასტრუქტურას, უნდა გადაუღოს ფოტო და განათავსოს ფიქს თბილისის აპლიკაციაში.
  • რის შემდეგაც ამას სისტემაში შესაბამისი სამსახური ნახავს და ის ვალდებულია პრობლემა რაც შეიძლება მალე გამოასწოროს.
  • მოქალაქეს კი მიუვა შეტყობინება, როცა კონკრეტული ადგილი თუ ინფრასტრუქტურა შეკეთდება.