რატომ არის მნიშვნელოვანი: 2011 წლის 7 ივლისს შსს-ს თანამშრომლებმა ჯაშუშობის ბრალდებით დააკავეს ევროპის პრეს ფოტოსააგენტო ეპა-ს ფოტორეპორტიორი ზურაბ ქურციკიძე, საგარეო საქმეთა სამინისტროს ფოტორეპორტიორი გიორგი აბდალაძე, პრეზიდენტის ადმინისტრაციის ფოტორეპორტიორი ირაკლი გედენიძე და მისი ცოლი, რედაქცია პრაიმ ტაიმის ფოტორედაქტორი ნათია გედენიძე.

  • ისინი 2011 წლის 26 მაისს რუსთაველის გამზირზე ხელისუფლების საწინააღმდეგო საპროტესტო აქციის დროს მომიტინგეების დარბევას აშუქებდნენ.
  • მათ ბრალად ედებოდათ "ერთ-ერთი უცხო ქვეყნის სპეცსამსახურის საფარქვეშ მოქმედი ორგანიზაციისთვის, საქართველოს ინტერესების საზიანოდ, მათი სამსახურებრივი მდგომარეობიდან გამომდინარე, სხვადასხვა სახის ინფორმაციის მიწოდებაში".
  • 2017 წლის 20 ივლისს, ახალი ხელისუფლების პირობებში, თბილისის საქალაქო სასამართლომ ე.წ ფოტოგრაფების საქმეზე ბრალდებული მაღალჩინოსნების, ალექსანდრე მუხაძისა და დავით დევნოზაშვილის მიმართ გამამტყუნებელი განაჩენი დაადგინა.
  • ბრალდების მხარის ცნობით, დავით დევნოზაშვილი იყო ის პირი, რომელმაც 2011 წელს ჯაშუშობაში ბრალდებულ ფოტოგრაფებს იძულებითა და შანტაჟით დააწერინა აღიარებითი ჩვენებები.

საქმის მასალების თანახმად, დევნოზაშვილმა დაკავებულების ფსიქოლოგიური ზეწოლისა და დაშინების გზით მოიპოვა წინასწარ შეთხზული ცრუ აღიარებითი ჩვენებები ჯაშუშურ ქსელში მონაწილეობის შესახებ.

  • სააპელაციოს გადაწყვეტილებით, დავით დევნოზაშვილი დამნაშავედ სცნეს სამსახურებრივი უფლებამოსილების გადამეტებაში, ჩადენილი ძალადობით და დაზარალებულის პირადი ღირსების შეურაცხყოფით.
  • ალექსანდრე მუხაძე კი, ასევე გამტყუნდა სამსახურებრივი უფლებამოსილების გადამეტებისათვის, რამაც ფიზიკური პირის უფლების, საზოგადოების და სახელმწიფოს კანონიერი ინტერესის არსებითი დარღვევა გამოიწვია.
  • დავით დევნოზაშვილს განესაზღვრა 4 წლითა და 6 თვით თავისუფლების აღკვეთა. ასევე დამატებითი სასჯელის სახით 1 წლითა 4 თვის ვადით ჩამოერთვა თანამდებობის დაკავების უფლება.
  • ალექსანდრე მუხაძეს კი საბოლოოდ განესაზღვრა 1 წლითა და 6 თვის ვადით თავისუფლების აღკვეთა, ამავე ვადით ჩამოერთვა თანამდებობის დაკავების უფლება.
  • 2018 წელს სააპელაციო სასამართლომ ფოტორეპორტიორების მიმართ გამამართლებელი განაჩენი გააუქმა და ისინი სრულად გაამართლა.

დეტალები: დღეს ცნობილი გახდა, რომ თბილისის საქალაქო სასამართლომ ირაკლი და ნათია გედენიძეების, ზურაბ ქურციკიძისა და გია აბდალაძის საქმეზე პროკურატურას მორალური ზიანის ანაზღაურება დააკისრა.

  • ფოტორეპორტიორმა, ნათია გედენიძემ სასამართლოს გადაწყვეტილება პრეცედენტული უწოდა და თქვა, რომ მსგავს მუხლზე საქართველოში მორალური ზიანის ანაზღაურების პრაქტიკა ჯერ არ ყოფილა.