კომპანია რუსთავის წყალი ხრამის სათავე ნაგებობაზე ქალაქ რუსთავის წყალმომარაგების სტაბილურობისთვის წყალქვეშ რთულ ტექნიკურ სამუშაოებს ატარებს. მოწვეული მყვინთავების საგანგებო ჯგუფი შახტური ჭების სარეაბილიტაციო სამუშოებს რამდენიმე ეტაპად განახორციელებს.

ფოტო: რუსთავის წყალი

ამ დრომდე ქალაქ რუსთავის წყალმომარაგება 5 შახტური ჭით ხდებოდა, აგვისტოს ბოლოდან კი დამატებით, ორი შახტური ჭა შევა ექსპლუატაციაში, რაც ქალაქის წყალმომარაგებას მნიშვნელოვნად გააუმჯობესებს.

ფოტო: რუსთავის წყალი

"სამუშაოების პირველი ეტაპის ფარგლებში 21 მეტრი სიღრმის წყლით დაფარულ შახტურ ჭაში სპეციალურად მოწვეული მყვინთავები მთელი დღის განმავლობაში მუშაობდნენ", — აღნიშნავს თემურ ჯანელიძე, რუსთვის წყლის გენერალური დირექტორის მოადგილე, — "საერთაშორისო მყვინთავების ჯგუფმა რთული ტექნიკური სამუშაოები ჩაატარა. შედეგად შესაძლებელი გახდა, რომ თითოეულ შახტურ ჭაში არსებული შვიდი ძველი ურდული ახალი, თანამედროვე ჩამკეტ-მარეგულირებელი ურდულით შეიცვალოს და ახალი ტუმბო-აგრეგატები დამონტაჟდეს.

"მიმდინარე სარეაბილიტაციო პროექტი განსაკუთრებით მნიშვნელოვანია კომპანია რუსთავის წყლის მიერ 2023 წელს დაგეგმილ სამუშაოებს შორის. აღსანიშნავია, რომ 2023 წელს დაგეგმილი თითოეული სარეაბილიტაციო პროექტის დასრულებასთან ერთად წყალმომარაგება ეტაპობრივად გაუმჯობესდება და წლის ბოლოდან ქალაქ რუსთავისა და ქალაქ გარდაბნის მოსახლეობის მომსახურების ხარისხი მნიშვნელოვნად უკეთესი გახდება".

ფოტო: რუსთავის წყალი

კომპანია რუსთავის წყალი ქალაქ რუსთავის წყალმომარაგების სტაბილურობისთვის 2023 წელს 30 მილიონ ლარს დახარჯავს და სხვადასხვა მასშტაბის 19 სარეაბილიტაციო პროექტს განახორციელებს.