ინფორმაციას სოციალური სამართლიანობის ცენტრი ავრცელებს, რომელიც ჟურნალისტის ინტერესებს იცავდა.

რატომ არის მნიშვნელოვანი: სასამართლოს გადაწყვეტილებით, აჭარის ტელევიზიიდან გადაცემა ჰეშთეგის წამყვან-რეპორტიორის, მალხაზ რეხვიაშვილის გათავისუფლებით დაირღვა ჟურნალისტის შრომითი უფლებები და მისი გამოხატვის თავისუფლება.

  • დადგინდა, რომ გათავისუფლების ერთადერთი მიზეზი, რეხვიაშვილის მიერ პირად სოციალურ ქსელში საჯაროდ გამოხატული კრიტიკული მოსაზრებები, სრულად დაცული იყო გამოხატვის თავისუფლებით და არ არსებობდა ამ უფლების შეზღუდვის საფუძვლები.

დეტალები: სოციალური სამართლიანობის ცენტრში ამბობენ, რომ გადაწყვეტილება მნიშვნელოვანი პრეცედენტია.

  • "განამტკიცებს შრომითი უფლებების დაცვის, გამოხატვის თავისუფლების, ჟურნალისტურ საქმიანობაში ჩარევის დაუშვებლობას, ხაზს უსვამს ჟურნალისტის პროფესიული დამოუკიდებლობის არსებით მნიშვნელობას დემოკრატიული და სამართლებრივი სახელმწიფოს ჩამოყალიბების გზაზე".

რეხვიაშვილის თქმით, აჭარის ტელევიზიას 5 ათასი ლარის ოდენობით კომპენსაციის გადახდა დაეკისრა.

  • "თავისთავად, კომპენსაციის ეს თანხა უსამართლოდ დაბალია, მაგრამ ამ ეტაპზე, ჩემი აზრით, არ გავასაჩივრებ. მიზანი, რომ დამემტკიცებინა — ტყუილად გამომიშვეს, მიღწეულია", — დაწერა მან.
  • ჟურნალისტი არ გამორიცხავს, რომ იურისტებთან კონსულტაციის შემდეგ გადაწყვეტილება შეცვალოს და კომპენსაციაზე იდავოს.