ცოტა ხნის წინ წამყვანი გლობალური აქსელერატორის ქართული პროგრამის 500 Georgia-ს სტარტაპების მორიგი ნაკადი გამოვლინდა. მენტორებმა კი უკვე დაიწყეს მათი გადამზადება, მათთვის საკუთარი ცოდნისა და გამოცდილების გაზიარება.

ვინ არიან ეს მენტორები და როგორი გამოცდილებით გამოირჩევიან ისინი, ამას ქვევით მოგიყვებით:

ჯასტინა იასტჟებსკა

ჯასტინა მარკეტინგის სპეციალისტია და მისი 11 წლიანი გამოცდილება მოიცავს ისეთ საქმიანობებს, როგორებიცა: ბიზნესების დახმარება პროდუქტების შექმნასა და ბაზარზე გატანაში, ვებსაიტების ოპტიმიზაციის კუთხით მუშაობა, რაც მომხმარებლის უკეთეს ონლაინ გამოცდილებას უზრუნველყოფს. ასევე, ჯასტინა ხელს უწყობს ბიზნესებს, მეტი შემოსავალი გამოიმუშაონ, მოიძიონ საქმიანი პარტნიორები, დადონ გარიგებები, გაზრდონ გაყიდვები და ის ასევე სპეციალიზებულია იმეილ მარკეტინგისა და ელექტრონული კომერციის ოპტიმიზაციაშიც.

ტიმურ დაუდფოტა

ტიმური თავად არის სტარტაპის დამფუძნებელი და 500 აქსელერაციის პროგრამის ალუმნი. ის მუშაობდა უმსხვილეს ბრენდებთან, როგორებიცაა: Coca-Cola, Burger King, Disney და Invisalign და მათ ინფლუენსერ მარკეტინგის კამპანიების წარმოებაში ეხმარებოდა. ის ასევე მუშაობდა მსოფლიოს უმსხვილეს გამომცემლებთან, როგორებიც არიან: Time Inc, GQ ჟურნალი, TechCrunch, Vogue, Teen Vogue, Popsugar, PBS და მრავალ სხვასთან. მისივე შექმნილი SaaS კომპანია გამომცემლებს საშუალებას აძლევდა, პირდაპირ გადაეტანათ შინაარსი კომპიუტერიდან Snapchat-ის არხებზე. ამ კომპანიამ უდიდესი წარმატება ჰპოვა და მიიპყრო ბევრი გამოჩენილი VC-ს ყურადღება, მათ შორის, 500 Global-ისაც. 500 Global-ში მუშაობის პერიოდში მან გააფართოვა თავისი უნარები და ყურადღება გაამახვილა პროდუქტსა და ზრდაზე.

დენის კიბირევი

დენისის კარიერა 17 წლიან გამოცდილებას აერთიანებს - ამ პერიოდის განმავლობაში ის კომპანიებს ზრდაზე ორიენტირებული სტრატეგიების შექმნაში ეხმარებოდა, ხოლო ბოლო 10 წლის განმავლობაში კი ის ხელმძღვანელობდა ისეთ პლატფორმებსა და კომპანიებს, როგორებიც არიან: Microsoft for Startups & PwC, Freelancer.com, Unilever. დენისი ასევე იყო შვეიცარიის მთავრობის სტარტაპ პროგრამების აღმასრულებელი დირექტორი ვიეტნამსა და აღმოსავლეთ ევროპაში და გამოცდილი მენტორი, რომელიც ხელმძღვანელობდა 300+ დამფუძნებელს შვიდივე კონტინენტიდან.

დღესდღეობით ის არის სამთავრობო ინოვაციური პროგრამების - მათ შორის ევროკავშირის კოსმოსური სააგენტოსა და ვიეტნამის სტარტაპების მხარდაჭერის ეროვნულ ცენტრის მრჩეველი. დენისი ასევე არის სტარტაპთან დაკავშირებული ღონისძიებების სპიკერიც.

მომდევნო თვეების განმავლობაში 500 Georgia-ს აქსელერაციის პროგრამის მონაწილე სტარტაპებს სწორედ ეს ადამიანები გაუწევენ მენტორობას.

პედრო ვიეირა

პედრო მეცნიერი, ტექ.დამფუძნებელი და ინვესტორია, რომელსაც საკმაოდ ღირებული გამოცდილება აქვს. მისი დაფუძნებულია GoodGuide, ციფრული ჯანმრთელობის სტარტაპი, რომელიც შემდგომ მან გაყიდა. ამ ნაბიჯის შემდეგ მან შექმნა West to West აშშ არაკომერციული ორგანიზაცია, რომელიც ეხმარება პორტუგალიელ და ევროკავშირის მეწარმეებს, მიაღწიონ წარმატებას სილიკონ ველიზე (200+ პორტფელი). ცოტა ხნის წინ მან ასევე დააარსა Shilling Founders Fund, 50 მილიონიანი ადრეული ეტაპის ტექნიკური ფონდი, რომელიც ორიენტირებულია Pre-Seed და Seed ეტაპებზე მყოფ კომპანიებზე. ამჟამად, ის არის 500 Global-ის პარტნიორი - პედრომ მონაწილეობა მიიღო რამდენიმე პროგრამის შემუშავებასა და ოპერირებაში მთელი მსოფლიოს მასშტაბით და დღემდე ხელმძღვანელობს ყველა სააქსელერაციო და საინვესტიციო ინიციატივას EECCA-ში 500 Georgia ფონდის მეშვეობით.

აქვე შეგახსენებთ, რომ 500 Global არის გლობალური ვენჩურული კაპიტალის კომპანია, რომელიც 2010 წელს დაფუძნდა და ადრეულ ინვესტიციებს ახორციელებს სწრაფად მზარდ ტექნოლოგიურ სტარტაპებში. დაარსების დღიდან 500 Global-მა მხარი დაუჭირა 2600-ზე მეტი კომპანიის 5000-ზე მეტ დამფუძნებელს, მსოფლიოს 81 ქვეყნის მასშტაბით. მისი პორტფოლიო შეიცავს $1 მილიარდის ღირებულების 45 და $100 მილიონზე მეტის ღირებულების 130-ზე მეტ კომპანიას. 500 Global მჭიდროდ თანამშრომლობს დაინეტრესებულ მხარეებთან და კონსულტაციებს უწევს მთავრობებსა და კორპორაციებს, შექმნან სამეწარმეო ეკოსისტემები სტარტაპების სწრაფი განვითარებისთვის.