რატომ არის მნიშვნელოვანი: ომის დაწყების შემდეგ რუსები უკრაინის ოკუპირებული რეგიონებიდან ბავშვებს იტაცებენ და იძულებით აშვილებენ, ამაში დიდ როლს თამაშობს ე.წ. ბავშვთა უფლებადამცველი მარია ლვოვა-ბელოვა.

  • კრემლი არასრულწლოვნებს პროპაგანდისტული სიუჟეტების მოსამზადებლად იყენებს და ამტკიცებინებს, თითქოს უკრაინის შეიარაღებული ძალები მტერია, რუსეთი კი მეგობარი.
  • უკვე ხუთი სამაშველო მისია ჩატარდა, რომლის დროსაც უკრაინაში ათობით ბავშვი დააბრუნეს.

ვინ არის მარია: ერთ-ერთ რუსული გამოცემის თანახმად, ის პრეზიდენტის ოფისში ბავშვთა უფლებების კომისრად ომამდე დაინიშნა და შეხვედრაზე პუტინს უყვებოდა, რომ ჰყავს ცხრა ბავშვი, აქედან 4 ნაშვილებია, ხოლო "13 ახალგაზრდა შშმ პირი მისი მეურვეობის ქვეშ იმყოფება".

  • ომის დაწყების შემდეგ ის აქტიურად ცდილობდა წარმოეჩინა, რომ უკრაინიდან ბავშვების "ევაკუაციას" ცდილობდა.
  • 2 თვეში, უკვე საერთაშორისო სანქციების სიებში მოხვდა, უკრაინის ოკუპირებული ნაწილიდან არასრულწლოვანთა უკანონო გაყვანის ორგანიზებისთვის.

  • 17 მარტს საერთაშორისო სისხლის სასამართლომ ვლადიმერ პუტინისა და მარია ალექსეევნა ლვოვა-ბელოვას დაკავების ორდერი გასცა — განცხადებაში აღნიშნული იყო, რომ ის, სავარაუდოდ, პასუხისმგებელია მოსახლეობის (ბავშვების) უკანონო დეპორტაციასა და უკანონო გადაყვანაზე.

  • როგორც რუსულმა გამოცემა ვიორსტკამ გაარკვია, 2022 წელს რუსებმა Yandex-ის საძიებო ველში 30 824-ჯერ მოძებნეს "ავიყვანო ბავშვი დონბასიდან", ამ თხოვნების დაახლოებით ნახევარი — 13 ათასზე მეტი მარტ-აპრილში დაფიქსირდა, 2021 წლისთვის კი ასეთი მოთხოვნის რაოდენობა ნულოვანი იყო.
  • მაშინ ლვოვა-ბელოვა ადასტურებდა, რომ მოთხოვნა მართლაც ბევრი იყო და ყველასთვის, ვისაც სურდა ოკუპირებული ტერიტორიებიდან გატაცებული ბავშვის წაყვანა, სპეციალური ინსტრუქციაც მოამზადა.

ფილიპის გატაცება: აგვისტოში მან გამოაცხადა, რომ თავად გახდა უკრაინელი ბავშვის, მარიუპოლელი 15 წლის ფილიპის აღმზრდელი. გაავრცელეს კადრებიც, სადაც ჩანდა, რომ ბავშვი რუსულ პასპორტს იღებს.

  • სხემის ჟურნალისტებმა (რადიო თავისუფლების უკრაინული პროექტი) გაარკვიეს, რომ ფილიპს უკრაინაში კანონიერი მეურვეები ჰყავს.
  • რუსული პროპაგანდისტული მედიის, ცარგრადის ეთერში მოზარდს ათქმევინეს, თითქოს ომის დაწყების შემდეგ ის სახლიდან გამოაგდო მეურვემ, რომელთანაც რთული ურთიერთობა ჰქონდა და მოაყოლეს, "როგორ გადაარჩინეს" რუსებმა.
  • თუმცა ამ ინფორმაციას სხემის ჟურნალისტებს უკრაინული წყაროები არ უდასტურებენ.
  • ბელოვა, რომელიც თავს ფილიპის დედად ასაღებს, ამბობს, რომ მართ მარტივი ურთიერთობა არ აქვთ, მაგრამ ერთმანეთი უყვართ, ამავდროულად კი ცდილობს ისე წარმოაჩინოს, თითქოს ფილიპს "უკრაინული პროპაგანდის" გამო რუსი ბავშვები სძულს.