გადაწყვეტილების შესახებ ცნობილი დღეს გახდა.

რატომ არის მნიშვნელოვანი: ორდერს საფუძვლად უდევს უკრაინაში წამოწყებული სრულმასშტაბიანი ომი.

  • სასამართლო ომის დანაშაულების ჩადენის გამო რუსეთის პრეზიდენტს ინდივიდუალურ სისხლის სამართლის პასუხისმგებლობას აკისრებს.

დეტალები: გადაწყვეტილება სისხლის სამართლის საერთაშორისო სასამართლოს II წინასასამართლო პალატამ მიიღო.

  • დაპატიმრების ორდერი გაცემულია ვლადიმერ ვლადიმროვიჩ პუტინისა და მარია ალექსეევნა ლვოვა-ბელოვას მისამართით.
  • "ვლადიმერ ვლადიმროვიჩ პუტინი, დაბადებული 1952 წლის 7 ოქტომბერს, სავარაუდოდ პასუხისმგებელია ომის დანაშაულზე, მოსახლეობის (ბავშვების) უკანონო დეპორტაციაზე და მოსახლეობის (ბავშვების) უკანონო გადაყვანაზე უკრაინის ოკუპირებული ტერიტორიებიდან რუსეთში", — ნათქვამია განცხადებაში.
  • მარია ალექსეევნა ლვოვა-ბელოვა, რომელიც პრეზიდენტის ოფისში ბავშვთა უფლებების კომისარია, სავარაუდოდ პასუხისმგებელია მოსახლეობის (ბავშვების) უკანონო დეპორტაციასა და მოსახლეობის უკანონო გადაყვანაზე.
  • დაკავების ორდერი პროკურატურის მიერ 2023 წლის 22 თებერვალს წარდგენილი განცხადებების საფუძველზე გაიცა.

გამოხმაურებები: მომხდარს Twitter-ზე გამოეხმაურა უკრაინის საგარეო საქმეთა მინისტრი, დმიტრო კულება.

  • "მართლმსაჯულების ბორბლები დატრიალდა: მივესალმები ICC-ის გადაწყვეტილებას ვლადიმერ პუტინისა და მარია ლვოვა-ბელოვას დაპატიმრების ორდერის გაცემის შესახებ. საერთაშორისო დამნაშავეები პასუხს აგებენ ბავშვების ქურდობისთვის და სხვა საერთაშორისო დანაშაულებისთვის".
  • ხოლო რუსეთის ყოფილმა პრეზიდენტმა, დიმიტრი მედვედევმა პუტინის დაკავების ორდერი ტუალეტის ქაღალდს შეადარა.