სუდანის გასამხედროებულმა ჯგუფმა, RSF-მა გამოაცხადა, რომ დედაქალაქ ხარტუმში მიმდინარე მძიმე ბრძოლების მიუხედავად ცეცხლს მალე შეწყვეტენ.

დეტალები: 72-საათიანი ცეცხლის შეწყვეტა ძალაში პარასკევს, დილის 6 საათზე შევა.

  • მათი განცხადებით, ცეცხლის შეწყვეტის გადაწყვეტილება მუსლიმურ დღესასწაულს, ეიდ ალ-ფიტრს უკავშირდება.
  • სუდანის არმიას ცეცხლის შეწყვეტის გადაწყვეტილება არ დაუდასტურებია.

რატომ არის მნიშვნელოვანი: უახლესი ცნობებით, შეტაკებებს ამ დროისთვის სულ მცირე 350 ადამიანი ემსხვერპლა, დაშავებულთა რაოდენობა კი 1 100-ს აღწევს.

  • მსოფლიო ლიდერები ცდილობდნენ ზეწოლას მოახდინონ ორივე მხარეზე, რათა ცეცხლის შეწყვეტას მიაღწიონ და საკუთარი მოქალაქეების ევაკუაცია შეძლონ.
  • "ბრძოლა უნდა შეწყდეს", — განაცხადა უსაფრთხოებისა და საგარეო ურთიერთობების საკითხებში ევროკავშირის უმაღლესმა წარმომადგენელმა, ჯოზეფ ბორელმა ბრიუსელში.
  • მისი ცნობით, სუდანში ევროკავშირის ელჩს, აიდან ოჰარას საკუთარ რეზიდენციაში თავს დაესხნენ.

კონტექსტი: სუდანი, სიდიდით მესამე ქვეყანა აფრიკაში, მდებარეობს არასტაბილურ და გეოპოლიტიკურად მნიშვნელოვან რეგიონში.

  • კონფლიქტი მას შემდეგ გამწვავდა, რაც დაპირისპირებულმა მხარეებმა ქვეყნის სამოქალაქო მმართველობაზე გადასვლასთან დაკავშირებით შეთანხმებას ვერ მიაღწია.
  • სუდანი ესაზღვრება შვიდ ქვეყანას, რომელთაგანაც თითოეულს უსაფრთხოების გამოწვევები აქვს, რაც გადაჯაჭვულია ხარტუმის პოლიტიკასთან.