ფარმაცევტულმა კომპანიამ შაბათს დაანონსა, რომ კიბოს, გულ-სისხლძარღვთა და აუტოიმუნური დაავადებების ვაქცინები 2030 წლისთვის იქნება მზად. ამის შესახებ The Guardian-ის მიერ გამოქვეყნებულ სტატიაში ვიგებთ.

დოქტორმა პოლ ბარტონმა, Moderna-ს მთავარმა სამედიცინო ოფიცერმა განაცხადა, რომ მისი კომპანია მსგავსი დაავადებების საწინააღმდეგ ვაქცინას უკვე 2030 წლისთვის შემოგვთავაზებს.

"ჩვენ გვექნება ეს ვაქცინა და ის იქნება უაღრესად ეფექტიანი. ამით მილიონობით სიცოცხლეს გადავარჩენთ. ჩვენ შევქმნით პერსონალიზებულ ვაქცინებს სხვადასხვა ტიპის სიმსივნის საწინააღმდეგოდ", — თქვა ბარტონმა.

მან ასევე აღნიშნა, რომ mRNA თერაპიას შეუძლია გადაჭრას იშვიათი დაავადებების პრობლემა, რომელთათვისაც ამჟამად არ არსებობს ხელმისაწვდომი თერაპია.

"ვფიქრობ, ჩვენ გვექნება mRNA-ზე დაფუძნებული თერაპია ისეთი დაავადებებისთვის, რომლებიც ადრე არ იყო განკურნებადი. 10 წლის შემდეგ მივუახლოვდებით სამყაროს, სადაც თქვენ ნამდვილად შეძლებთ დაავადების გენეტიკური მიზეზის იდენტიფიცირებას და შედარებით მარტივად მათ დამარცხებას. ეს ყველაფერი mRNA-ზე დაფუძნებული ტექნოლოგიის გამოყენებით", — დასძინა ბარტონმა.

ნაწილობრივ პანდემიის გამო

ბარტონი ვაქცინების მხრივ პროგრესს ნაწილობრივ COVID-19-თან აკავშირებს.

"ვფიქრობ, რომ პანდემიამ ამ ტექნოლოგიის პროგრესი დააჩქარა. მან მოგვცა საშუალება, გაგვეფართოებინა წარმოება. ასე რომ, ჩვენ ძალიან კარგად ვისწავლეთ ვაქცინების სწრაფად და უსაფრთხოდ დამზადება", — განმარტა მეცნიერმა.

ბარტონს სხვა ექსპერტებიც ეთანხმებიან.

"პანდემიამ ჩვენი სფერო წინ წაწია და პროცესები დაჩქარდა. ეს შეეხო არა მხოლოდ ვაქცინის ტრადიციულ ტექნოლოგიებს, არამედ ახალ მიდგომებს, რომლებიც ადრე არ იყო ლიცენზირებული. რა თქმა უნდა, mRNA მიეკუთვნება ამ კატეგორიას, ისევე როგორც ჩვენი ვაქცინა", — თქვა დოქტორ ფილიპ დუბოვსკიმ, Novavax-ის კვლევისა და განვითარების პრეზიდენტმა.

"ფაქტია, რომ ვაქცინების მიმართ ინტერესი გაცილებით მეტია. ახლა მთავარია თუ რა იქნება შემდეგი", — დასძინა პროფესორმა ენდრიუ პოლარდმა, დიდი ბრიტანეთის ვაქცინაციისა და იმუნიზაციის ერთობლივი კომიტეტის თავმჯდომარემ.

აღსანიშნავია, რომ თებერვალში, აშშ-ს სურსათისა და წამლების ადმინისტრაციამ (FDA) Moderna-ს კიბოს პერსონარიზირებულ ვაქცინას დიდი ყურადღება დაუთმო. მაშინ აღინიშნა, რომ კომპანიას ამ მხრივ სერიოზული პროგრესი ჰქონდა. ეს კი იმას ნიშნავს, რომ მარეგულირებელი განხილვა დაჩქარდება.