ამის შესახებ საქართველოს დემოკრატიული ინიციატივა (GDI) განცხადებას ავრცელებს.

რატომ არის მნიშვნელოვანი: 6 თებერვალს პარლამენტის თავმჯდომარის ბრძანებით, მედიას ახალი შეზღუდვები დაუწესდა.

  • ჟურნალისტებსა და ოპერატორებს საკანონმდებლო ორგანოში კონკრეტული ქცევის წესების დაცვა ევალებათ.
  • სწორედ მათი დარღვევის ბრალდებით სამი ოპოზიციური ტელევიზიის, TV პირველის, ფორმულასა და მთავარი არხის, ჟურნალისტებსა და ოპერატორებს აკრედიტაცია შეუჩერდათ.
  • გადაწყვეტილება პარლამენტმა მას შემდეგ მიიღო, რაც მედიის წარმომადგენლებმა დეპუტატებს კითხვები დაუსვეს აშშ-ს მიერ მოსამართლეების სანქცირებასა და ქალთა სექსუალურ შევიწროებაში მხილებულ შალვა რამიშვილზე.
  • მედიის ადვოკატირების კოალიცია საკანონმდებლო ორგანოს მიერ შემოღებულ წესებს ჟურნალისტების სადამსჯელო მექანიზმს უწოდებს, აკრედიტაციის წესი პრობლემურია ქარტიისა და სახალხო დამცველის შეფასებითაც.

დეტალები: ორგანიზაციის განცხადებით, შალვა პაპუაშვილის ბრძანება წინააღმდეგობაში მოდის კონსტიტუციის მე-17 მუხლთან, რომლითაც გარანტირებულია ადამიანების უფლება, თავისუფლად მიიღონ და გაავრცელონ ინფორმაცია.

  • "დემოკრატიული საზოგადოებისთვის მიუღებელია ისეთი წესების არსებობა, რომელიც მედიას ხელს უშლის განახორციელოს მისი ძირითადი ფუნქცია: უზრუნველყოს საზოგადოების ინფორმირება", — ამბობენ GDI-ში.
  • მათივე შეფასებით, მედიისთვის შემოღებული წესები პარლამენტს ანიჭებს უფლებამოსილების ბოროტად გამოყენების შესაძლებლობას იმ ჟურნალისტების წინააღმდეგ, რომელთა კითხვებიც, შესაძლოა, დისკომფორტს უქმნიდეს მმართველ პარტიას.
  • "ამგვარი მოწესრიგება გულისხმობს ჟურნალისტურ საქმიანობაზე ინფორმაციული ფილტრის დაყენებას, რასაც მსუსხავი ეფექტი გააჩნია. მოქმედი წესის პირობებში ჟურნალისტებმა აკრედიტაციის შეჩერების შიშით, შესაძლოა, თავი აარიდონ მმართველი პარტიისთვის კრიტიკული კითხვების დასმა", — ნათქვამია განცხადებაში.