დღეს უსაფრთხოების სამსახურის ხელმძღვანელმა, გრიგოლ ლილუაშვილმა დაადასტურა, რომ რამდენიმე დღის წინ საქართველოში არ შემოუშვეს აშშ-ის მოქალაქე, ჯეიმსონ მარშალ ქომინსი.

რატომ არის მნიშვნელოვანი: გუშინ ცნობილი გახდა, რომ ამერიკის შეერთებული შტატების სახელმწიფო დეპარტამენტმა სანქციები დაუწესა საქართველოში სამ მოქმედ და ერთ ყოფილ მოსამართლეს — ლევან მურუსიძეს, მიხეილ ჩინჩალაძეს, ირაკლი შენგელიას და ვალერიან ცერცვაძეს.

  • სახელმწიფო დეპარტამენტის განცხადებით, მათ ბოროტად გამოიყენეს თანამდებობა, როგორც სასამართლოს თავმჯდომარეებმა და იუსტიციის უმაღლესი საბჭოს წევრებმა.
  • დღეს გაჟღერდა ვარაუდი, რომ მოსამართლეების სანქცირება სწორედ ქომინსის საქართველოში არ შემოშვებით იყო ინსპირირებული.

დეტალები: აშშ-ს ელჩმა განაცხადა, რომ საქართველოში აშშ-ის მოქალაქის არშემოშვებასა და სახელმწიფო დეპარტამენტის მხრიდან ქართველი მოსამართლეების სანქცირებას შორის კავშირი არ არსებობს.

  • "ეს კონსპირაციული თეორიების ნაწილია, რაც გვინახავს, რასაც ხშირად იმეორებს მმართველი პარტია", — დასძინა მან.

ქომინსი ევრაზიის საკითხების სპეციალისტი, სტრატეგიული კონსულტანტი და კრიზის მენეჯერია.

  • ლილუაშვილი აცხადებს, რომ იგი საქართველოში "დესტრუქციულად განწყობილი ჯგუფების, დასატრენინგებლად და მათთვის მითითებების მისაცემად" ჩამოდიოდა.
  • "აკერმანიც რომ ცოცხალი ყოფილიყო და შემოსულიყო, არ შემოვუშვებდით, მას შემდეგ, რაც მხილებული იყო იმაში, რა საქმიანობითაც იყო დაკავებული", — დასძინა ლილუაშვილმა.