პარლამენტის ვიცე-სპიკერმა, არჩილ თალაკვაძემ ჟურნალისტებთან საუბრისას განაცხადა, რომ დავით კეზერაშვილის გუშინდელი ინტერვიუ პოლიტიკური კორუფციის ნიშნებს შეიცავს.

რატომ არის მნიშვნელოვანი: თალაკვაძის შეფასებით, კეზერაშვილმა პრაქტიკულად "დაადასტურა", რომ ოპოზიციას აფინანსებს, ხოლო ოპოზიციურ პარტიებს ეს დეკლარირებული არ აქვთ.

• "ოპოზიციური პარტიები ვალდებულნი არიან საჯაროდ გასცენ პასუხი იმ განცხადებებს, რაც კეზერაშვილმა გააკეთა მედიის საშუალებით. ეს არის ძალიან შემაშფოთებელი განცხადება და არღვევს კანონით დადგენილ წესებს, რაც პარტიების დაფინანსების და საქმიანობის შესახებ არსებობს", — განაცხადა თალაკვაძემ.
• თავად კეზერაშვილმა, კი გუშინ ფორმულას ეთერში განაცხადა, რომ არიან სხვადასხვა პოლიტიკური სუბიექტები, მათ შორის სამოქალაქო სუბიექტებიც, რომლებსაც ხშირად სჭირდებათ სხვადასხვა დახმარება და ის ვალდებულად თვლის თავს, რომ მათ დაეხმაროს.

დეტალები: თალაკვაძის შეფასებით, საზოგადოებისთვის თავლებში ნაცარში შეყრაა კეზერაშვილის განცხადება, რომ გამჭვირვალე ბიზნესით გამდიდრდა.

• "დღეს კეთილშობილი ინტერესები აქვს, რომ რადიკალური ოპოზიცია დააფინანსოს. ვინ დაიჯერებს ამას?! ეს არის სიცრუე. ყველაფერი დევს ხელს გულზე და ახლა უკვე დროა, რაზეც მან ილაპარაკა, მოვისმინოთ ამაზე ოპოზიციური პარტიების განმარტებები", — დასძინა თალაკვაძემ.

გამოხმაურებები: პასუხად, გირჩის წევრმა, იაგო ხვიჩიამ განაცხადა რომ, ასეთი განცხადებებით დავით კეზერაშვილი უფრო ქართულ ოცნებას ეხმარება, ვიდრე ოპოზიციას, რადგან ეს მთელი ოპოზიციის დისკრედიტაციას იწვევს.

• "ჩვენ დავით კეზერაშვილთან არც კომუნიკაცია გვქონია და არც თანამშრომლობის სურვილი გაგვაჩნია, რადგან ჩვენთვის თავისუფლება უფრო მნიშვნელოვანია. თუ ფულს ვინმე გაძლევს, ფულს თავისუფლების სანაცვლოდ გაძლევს და ჩვენ მზად არ ვიყავით, თავისუფლება კეზერაშვილის ფულის გამო დაგვეთმო", — განაცხადა მან.
• "დავით კეზერაშვილი ჩვენ ნამდვილად არ გვაფინანსებს. ჩვენი ფინანსები გამჭვირვალეა, დაფინანსებას სახელმწიფო ბიუჯეტიდან ვიღებთ და სახელმწიფო აუდიტის სამსახურში ფინანსურ დეკლარაციას წარვადგენთ", — განაცხადა სტრატეგია აღმაშენებლის დეპუტატმა, პაატა მანჯგალაძემ განუცხადა.
• "არანაირი შავი ბუღალტერია არ გვაქვს. ეს რომ ასე იყოს, ჩვენს წინააღმდეგ შავი პიარის აგორებას ხელისუფლებას ვერავინ მოასწრებდა", — დასძინა მან.
• "ლელოს პრინციპი ასეთია, ვისთანაც ვთანამშრომლობთ, ღია და დეკლარირებულია — რაკი დავით კეზერაშვილთან თანამშრომლობა დეკლარირებული არა გვაქვს, ე.ი. ასეთი თანამშრომლობა არ არსებობს", — ასე გამოეხმაურა თალაკვაძეს პარტია ლელოს დეპუტატი, ანა ნაცვლიშვილი.