ამის შესახებ საზოგადოებრივი მაუწყებელი ბორდის წევრების საპასუხო განცხადებაში წერს.

რატომ არის მნიშვნელოვანი: საზოგადოებრივი მაუწყებლის სამეურვეო საბჭოს სხდომაზე ლიკა ბასილაია-შავგულიძემ გენერალურ დირექტორს, თინათინ ბერძენიშვილს მოუწოდა, წარმოადგინოს მოხსენებითი ბარათი პირველი არხის ახალი და მიმდინარე ამბების ბლოკის დირექტორზე, გიორგი გვიმრაძეზე და გაარკვიოს, რა არის მისი საგარეო ორიენტირი, მრწამსი და მისწრაფება.

  • "ეს ადამიანი ეჭვქვეშ აყენებს ჩვენს გზას, ჩვენს მისწრაფებებს, ჩვენს საგარეო კურსს, ეს არ მოდის თანხვედრაში მაუწყებლის პრიორიტეტებთან, რომლებიც მაუწყებელმა მოიკვლია, დაადგინა, დაამტკიცა და გვაქვს გაწერილი", — თქვა ბასილაია-შავგულიძემ საბჭოს კიდევ ორი წევრის, ლაშა ტუღუშისა და ზაზა აბაშიძის სახელით.

დეტალები: საზოგადოებრივი მაუწყებლის განცხადებით, საბჭოს წევრების ეს მოთხოვნა შემაშფოთებელია.

  • "ამ მოწოდებას აღვიქვამთ, ერთი მხრივ, ჩვენს თანამშრომელზე ზეწოლად და, ასევე, სარედაქციო დამოუკიდებლობის შელახვის მცდელობად. ადამიანის მრწამსის შესწავლის მოთხოვნა თავისთავად სახიფათო პრეცედენტია იმ საზოგადოებაში, სადაც პოლარიზაციის დაძლევის ამოცანა ისედაც მტკივნეულად დგას. ასევე, საშიშ ტენდენციას წარმოადგენს ადამიანების ორიენტაციისა და მრწამსის კვლევა და ამ ნიშნით სეგრეგაცია", — ნათქვამია განცხადებაში.
  • მაუწყებელში ამბობენ, რომ საბჭოს წევრები, იმის ნაცვლად, რომ იცავდნენ საზოგადოებრივი მაუწყებლის მისწრაფებებსა და სარედაქციო დამოუკიდებლობას, თავად ცდილობენ მის დარღვევას.
  • "პირველი არხი არის და იქნება ევროპული ინსტიტუცია, რომლისთვისაც სწორედ მრავალფეროვნებაა ერთ-ერთი უმნიშვნელოვანესი ღირებულება. მიგვაჩნია, რომ ამ ღირებულებას ვიცავთ საზოგადოების წინაშე მაღალი პასუხისმგებლობით და დისკუსიათა წარმოების მაღალი სტანდარტით".