ამის შესახებ უნივერსიტეტის რექტორმა, კონსტანტინე თოფურიამ გამართულ ბრიფინგზე ისაუბრა.

რატომ არის მნიშვნელოვანი: 12 მარტს, იმედის ეთერში ირაკლი ღარიბაშვილმა თქვა, რომ ფრანკლინის კლუბში, რომელიც საქართველოს უნივერსიტეტშია შექმნილი, ახალგაზრდებს "წამლავენ" და "ტვინს ურეცხავენ".

  • სწორედ ეს ახალგაზრდები დაადანაშაულა პრემიერმა რუსული კანონის საწინააღმდეგო აქციაზე ძალადობასა და პროვოკაციულ ქმედებებში.
  • მისივე მტკიცებით, პრეზიდენტობის დროს სააკაშვილმა უნივერსიტეტი გიული ალასანიას ერთ ლარად გადასცა.
  • მსგავსი მადისკრედიტირებელი განცხადებები გააკეთა დღეს კობახიძემაც.

დეტალები: თოფურიას თქმით, ბოლო დღეებში ცრუ განცხადებები უმაღლესი სასწავლებლისა და სტუდენტების დიკრედიტაციას ისახავს მიზნად.

  • ამბობს, რომ უნივერსიტეტის შენობები საჯარო აუქცინზე, დაახლოებით 4 მილიონ დოლარადაა შეძენილი, ეს თანხა კი საბანკო სესხით მიიღეს, რისი დამადასტურებელი დოკუმენტებიც არსებობს.
  • "ტყუილია, როცა ამბობენ, რომ ამ შენობებს ტექნიკური უნივერსიტეტი იყენებდა, აქ იყო დაუმთავრებელი მშენებლობები, კარკასები, სადაც ვერანაირი სასწავლო პროცესი თუ სხვა აქტივობა ვერ განხორციელდებოდა. ამ შენობების რეაბილიტაციისთვის უნივერსიტეტმა 12 მილიონი დოლარის სასესხო ხაზი გაჭრა ამერიკულ საფინანსო ინსტიტუტებთან".
  • "ტყუილია, როცა ამბობენ, რომ ამ შენობებს უნივერსიტეტი რუსეთთან ომის დროს დაეპატრონა, ჩაიხედეთ დოკუმენტებში, ისინი ომის დაწყებამდე, 2007 წელს, ნაწილი კი 2008 წელს ომის დაწყებამდე რამდენიმე თვით ადრე იქნა შეძენილი", — ამბობს ის.

თოფურიას თქმით, კობახიძისა და ღარიბაშვილის წინააღმდეგ ცილიწამებისთვის და საქმიანი რეპუტაციის შელახვისთვის საქალაქო სასამართლოში სარჩელი შეაქვთ.

  • "ყოველივე ეს კეთდება იმისთვის, რომ ვერავინ შეძლოს ახლა და მომავალში ჩვენს სტუდენტებს მიაძახოს თითქოს, მათი უნივერსიტეტი რაიმე კორუფციული გარიგებით შეიქმნა. ვწუხვართ, რომ ხელისუფლება მოქცეულია იმ იდეოლოგიური პროპაგანდის ტყვეობაში რასაც პუტინის პროპაგანდისტები დიდი ხანია ავრცელებენ", — ამბობს ის.