ჟურნალისტების დაცვის კომიტეტის (CPJ-ის) განცხადებაში ნათქვამია, რომ ხელისუფლებამ უნდა უზრუნველყოს მედიის თავისუფალი და უსაფრთხო მუშაობა.

რატომ არის მნიშვნელოვანი: რუსული კანონის წინააღმდეგ პროტესტის დაწყების დღიდან მედიის წარმომადგენლებს პროფესიული მოვალეობის შესრულებასა და გამოხატვის თავისუფლებით სარგებლობაში მიზანმიმართულად ეშლებოდათ ხელი.

  • 2 მარტს პარლამენტის ეზოდან ფიზიკური ძალის გამოყენებით გამოაგდეს On.ge-ის რედაქტორი, თამუნა გეგიძე, ფორმულას ფოტოგრაფი, ვახო ქარელი და ნეტგაზეთის ჟურნალისტი, მიხეილ გვაძაბია;
  • ამავე დღეს დააკავეს პუბლიკას დირექტორი, ზურაბ ვარდიაშვილი და ტაბულას ჟურნალისტი, ბექა ჯიქურაშვილი.

  • 7-8 მარტის აქციებზე სამართალდამცველებმა იძალადეს მედიის წარმომადგენლებზე და ხელი შეუშალეს ჟურნალისტურ საქმიანობაში, მიუხედავად იმისა, რომ იცოდნენ, ისინი ასრულებდნენ პროფესიულ მოვალეობას.

დეტალები: CPJ-ის პროგრამის დირექტორი, კარლოს მარტინეს დე ლა სერნა ამბობს, რომ საქართველოს ხელისუფლებამ უნდა ჩაატაროს სრული და გამჭვირვალე გამოძიება სამართალდამცავების მხრიდან ჟურნალისტების ხელშეშლის ფაქტებზე.

  • "მსოფლიოს ყურადღება სამართლიანად იყოს მიმართული საქართველოსკენ ამ დემონსტრაციების დროს და ხელისუფლება ვალდებულია, უზრუნველყოს, რომ ჟურნალისტებს შეეძლოთ, უსაფრთხოდ და დაუბრკოლებლად გააშუქონ ეს მნიშვნელოვანი მოვლენები", — განაცხადა მან.
  • ჟურნალისტთა დაცვის კომიტეტის თქმით, კომენტარისათვის მიმართეს საქართველოს პოლიციას, პარლამენტსა და სახელმწიფო დაცვის სპეციალურ სამსახურს, მაგრამ პასუხი არ მიუღიათ.