საქართველოს ჟურნალისტურ ეთიკის ქარტიის საბჭო შეშფოთებას გამოხატავს საზოგადოებრივი მაუწყებლის მიერ რადიო თავისუფლებასთან გაწყვეტილი კონტრაქტის გამო. ქარტია მოუწოდებს მაუწყებლის მენეჯმენტს, გადახედოს აღნიშნულ გადაწყვეტილებას და გააგრძელოს წითელი ზონისა და ინტერVIEW-ს მიწოდება მაყურებლისთვის, მით უმეტეს 2017 წლის ადგილობრივი თვითმმართველობის არჩევნების პერიოდში.

"ორივე გადაცემის შენარჩუნება საზოგადოებრივი მაუწყებლის ბადეში ძალიან მნიშვნელოვანია, რადგან წითელი ზონა და ინტერVIEW მაყურებელს მაღალი პროფესიული სტანდარტებით მომზადებულ მრავალფეროვან მედიაპორდუქტს სთავაზობდა."

საბჭოს განცხადების თანახმად, 2016 წლის საპარლამენტო არჩევნების პერიოდში, მედიამონიტორინგის ფარგლებში, გადაცემა ინტერVIEW შეფასდა როგორც ყველაზე მაღალი პროფესიული და ეთიკური სტანდარტების მქონე პოლიტიკური ტოქშოუ ქართულ მედიასივრცეში.

13 ივნისს ცნობილი გახდა, რომ საზოგადოებრივ მაუწყებელზე სალომე ასათიანის ინტერVIEW და გოგი გვახარიას წითელი ზონა ივლისის შუა რიცხვებიდან აღარ გავა. მაუწყებლის სტრატეგიული სამსახურის უფროსი, ია ანთაძე ამბობს, რომ მომავალი სეზონიდან მაუწყებლის ეთერში მხოლოდ კონკურსის წესით შერჩეული ან საკუთარი რესურსით დამზადებული გადაცემები მოხვდება. საზოგადოებრივი მაუწყებლის მიმდინარე და ახალი ამბების ბლოკის დირექტორმა, გიორგი გვიმრაძემ კი On.ge-ს უთხრა, რომ რადიო თავისუფლებამ მაუწყებლისგან ხელშეკრულებების ვადის ამოწურვის შესახებ მიიღო წერილი, თუმცა გაგრძელდება თუ არა გადაცემები, გვიმრაძეს კონკრეტული პასუხი არ აქვს.