დეტალები: კადრებში ჩანს, რომ პოლიციელები მთავარი არხის გადამღებ ჯგუფთან მიდიან და რამდენჯერმე, აგრესიულად ხელს კრავენ.

  • "უკან ბიჭო, აი, იქ იდექი", — ამ სიტყვებით მიმართავენ ჟურნალისტს.
  • ფორმულას ჟურნალისტის რეპლიკაზე, თუ რომ მისი კოლეგა სავალ ნაწილზე არ გადაადგილდებოდა, სამართალდამცავები არაფერს არ ამბობენ.
  • "ჩვენ ვიღებდით, აქ ვარსულებდით ჩვენს პროფესიულ მოვალეობას. ერთ-ერთმა პოლიციელმა სახეში დამარტყა და ჩემს ოპერატორს არ მისცა გადაღების შესაძლებლობა", — ამბობს მთავარი არხის ჟურნალისტი.

რატომ არის მნიშვნელოვანი: სპეცრაზმი აქციას წყლის ჭავლით და ცრემლსადენი გაზით 6-ზე მეტი საათის განმავლობაში შლიდა, თუმცა უშედეგოდ, შემდეგ კი დარბევაზე გადავიდა.

  • როგორც ადგილზე მყოფი On.ge-ის ჟურნალისტები ჰყვებიან, დილის 5 საათიდან პარლამენტთან განლაგებული რობოკოპები დაიძრნენ, მათ წინ წყლის ჭავლის მანქანა მოდიოდა, რომელიც აქტივისტებს უმიზნებდა და გზას ასე "წმენდდა".
  • პარალელურად ისროდნენ ცრემლსადენი გაზის ჭურვებსაც და იმდენად ბევრს, რომ ხალხი ტერიტორიიდან გასვლას ვერ ასწრებდა და ცუდად ხდებოდა.
  • აქციის მონაწილეთა ნაწილი გარიდებას და უსაფრთხო ადგილის პოვნას ცდილობდა, მაგრამ ვინც პოლიციას ჩაუვარდა ხელში, ძალის გამოყენებით დააკავეს და იძალადეს.
  • ძალადობენ ჟურნალისტებზეც — პოლიციელებმა სცემეს ფორმულას ჟურნალისტებსა და ოპერატორს.
  • "გვეგონა, რომ ჩვენც გვაკავებდნენ. საკმაოდ აგრესიულები იყვნენ, რამდენიმე მუშტი მეც ჩამარტყეს და ოპერატორსაც ჩაარტყეს. გვაქვს კადრებიც გადაღებული, როგორ უსწორდებიან მოქალაქეს ფიზიკურად", — ამბობს ჟურნალისტი, გიორგი კვიჟინაძე.
  • სამართალდამცველებმა დაარტყეს პუბლიკას ჟურნალისტებს, ბასტი მგალობლიშვილსა და ალექსანდრე ქეშელაშვილს.
  • ისინი რუსთაველის გამზირზე აქციის მონაწილეების დაკავების პროცესს იღებდნენ. კადრებში ისმის – "ჟურნალისტები მოაშორეთ".