პატრიოტთა ალიანსის ლიდერმა, ირმა ინაშვილმა, პარლამენტის სხდომაზე საგარეო საქმეთა სამინისტრო და ხელისუფლება კონგოში დატყვევებული ქართველი პილოტის, სოსო ოსორაულის მიმართ უმოქმედობაში დაადანაშაულა.

"ვერ ვხედავ, რომ ქართული სახელმწიფო დღეს იცავს ან რაიმეს აკეთებს სოსო ოსორაულის ადგილსამყოფელის მისაგნებად, მის დასახმარებლად. აბსოლუტური უმოქმედობაა საგარეო სამინისტროს მხრიდან" - განაცხადა ინაშვილმა და პარლამენტარებს სამუშაო ჯგუფის შექმნისკენ მოუწოდა.

პარლამენტის რეგიონული პოლიტიკისა და თვითმმართველობის კომიტეტის თავჯდომარემ, გიორგი ლილუაშვილმა, განაცხადა, რომ კონგოში იმყოფება საქართველოს ელჩი სამხრეთ აფრიკაში და აღნიშნულზე მოლაპარაკებებს აწარმოებს.

2017 წლის 27 იანვარს, აფრიკაში, კონგოს რესპუბლიკაში, ვერტმფრენი MI-24 ჩამოვარდა. მისი ერთ-ერთი პილოტი ქართველი სამხედრო მფრინავი სოსო ოსორაული იყო.

ოსორაული კონგოს 23 მარტის მოძრაობის (M23) მეამბოხეებს ჩაუვარდა ხელში.

საქართველოს ელჩი სამხრეთ აფრიკაში ბექა დვალი On.ge-სთან საუბრისას აცხადებს, რომ საგარეო უწყებას მხოლოდ თებერვლის ბოლოს დაუდასტურდა ოფიციალურად ინფორმაცია, რომ ოსორაული კონგოს უკანონო დაჯგუფების ტყვეა.