საზოგადოებრივი მაუწყებლის გენერალური დირექტორის, ვასილ მაღლაფერიძის გადაწყვეტილებით, შალვა რამიშვილი, რომელიც გადაცემების კონკურსის მესამე ეტაპზე ვერ გადავიდა, გადაცემის პილოტს მაინც ჩაწერს. რეკომენდაციით დირექტორს გადაცემების შესარჩევმა კომისიამ მიმართა. ამის შესახებ On.ge-ს საზოგადოებრივი მაუწყებლის აღმასრულებელი საბჭოს წევრმა, ია ანთაძემ და გადაცემების შესარჩევი კომისიის ერთ-ერთმა წევრმა, დავით ბუხრიკიძემ განუცხადეს.

ია ანთაძე ამბობს, რომ რამიშვილის გადაცემის გარდა კიდევ ორ გადაცემაზე გასცა გადაცემების შესარჩევმა კომისიამ რეკომენდაცია.

"საკონკურსო კომისიამ გადაწყვიტა, რომ დირექტორისთვის მიეცა რეკომენდაცია. თუ დირექტორი გამოყოფდა რესურს, მიეცათ ამ ჯგუფებისთვის საშუალება პილოტი მოემზადებინათ, რის შემდეგაც კომისია გადაწყვეტდა გასცემდნენ თუ არა რეკომენდაციას გადაცემები ყოფილიყო ეთერში," - ამბობს ია ანთაძე.

დავით ბუხრიკიძე ამბობს, რომ შალვა რამიშვილს რეკომენდაცია მან და კომისიის კიდევ რამდენიმე წევრმა არ მისცეს. თუმცა, კიდევ ვინ იზიარებდა მის მოსაზრებას არ ამხელს.

"პროექტი იყო საინტერესო, მაგრამ, რადგან ის დაკავშირებულია შალვა რამიშვილის პერსონასთან, რომელიც აფილირებული ხელისუფლებასთან და პერსონალური მიუღებლობის ფაქტორებთან, ამის გამო მეც და კომისიის რამდენიმე წევრმაც გადავწყვიტეთ არ მიგვეცა ხმა, მაგრამ საბოლოოდ ისე გამოვიდა, რეკომენდაცია მაინც მისცეს. არხის ხელმძღვანელობას რომ არ მიეცა მწვანე, არც მოხვდებოდა," - ამბობს ბუხრიკიძე.

შალვა რამიშვილი წლების განმავლობაში ტელეკომპანიებში მაესტროში, იმედსა და მეცხრე არხში საავტორო გადაცემის წამყვანი იყო. გარდა ამისა, სხვადასხვა დროს საქართველოს პრეზიდენტის არჩევნების დროს გიორგი მარგველაშვილის PR სამსახურში მუშაობდა და ჰქონდა ტელევიზია (202). ის რამდენიმე წლის განმავლობაში ქრთამის აღების ბრალდებით იყო დაკავებული.

საქართველოს საზოგადოებრივმა მაუწყებელმა ხუთ თემატიკაზე ცხრა გადაცემის შესარჩევად კონკურსი მიმდინარე წლის აპრილის დასაწყისში გამოაცხადა. კონკურსში 153 განაცხადი შევიდა, საიდანაც მესამე ტურში მხოლოდ 15 პროექტი გადავიდა. გადაცემებს შორის არ მოხვდა შალვა რამიშვილის პროექტიც.

პროგრამებს სპეციალური კომისია არჩევს, რომელიც დაკომპლექტებულია საზოგადოებრივი მაუწყებლის თანამშრომლებითა და მიწვეული ექსპერტებით.

კომისიის შემადგენლობაში შედიან:

1. დრამატურგი - თამარ ბართაია;
2. სოციოლოგი - იაგო კაჭკაჭიშვილი;
3. მედიაკრიტიკოსი - დავით ბუხრიკიძე;
4. სცენარისტი, რეჟისორი - სოფო ბაბლუანი;
5. წარმოებისა და ტექნიკური უზრუნველყოფის ბლოკის დირექტორი - თეო მაზმიშვილი;
6. სატელევიზიო არხების ხელმძღვანელი - რუსუდან მანჯგალაძე;
7. დოკუმენტური ფილმების სტუდიის ხელმძღვანელი - კოტე ჯანდიერი;
8. წარმოების დეპარტამენტის უფროსი - თემურ გოგოლაძე;
9. ვიზუალური გაფორმების სამსახურის უფროსი - კახაბერ ბუხრაშვილი;
10. კვლევისა და ანალიტიკის სამსახურის სოციოლოგი - რუსუდან ახვლედიანი;
11. ონლაინ მედია ხელმძღვანელი - თამარ კაციტაძე.