საერთაშორისო არასამთავრობო ორგანიზაციებმა შესაბამისი განცხადება დღეს გაავრცელეს.

რატომ არის მნიშვნელოვანი: ორგანიზაციების შეფასებით, საქართველოს ხელისუფლება უარს ამბობს მიხეილ სააკაშვილისთვის ადეკვატური სამედიცინო დახმარების გაწევაზე.

  • შედეგად, ექსპრეზიდენტი სიკვდილის, მუდმივი ინვალიდობის ან ჯანმრთელობის სხვა შეუქცევადი ზიანის საფრთხის წინაშე დგას.

დეტალები: საქართველოს ხელისუფლება არ გამოხმაურებია ორგანიზაციების მიერ ამ წლის 10 თებერვალს გაგზავნილ წერილს, სადაც შეშფოთებაა გამოთქმული ექსპრეზიდენტის ჯანმრთელობის გაუარესებაზე.

  • "მიხეილ სააკაშვილისთვის ადეკვატურ სამედიცინო დახმარებაზე უარის თქმა წარმოადგენს წამებას ან სხვა სასტიკ, არაადამიანურ ან ღირსების შემლახველ მოპყრობას და მის სიცოცხლეს სერიოზული რისკის ქვეშ აყენებს", — განაცხადა Amnesty International-ის აღმოსავლეთ ევროპისა და ცენტრალური აზიის დირექტორის მოადგილემ, დენის კრივოშეევმა.
  • ორგანიზაციების თქმით, საქართველოს ხელისუფლებამ სასწრაფოდ უნდა მიიღოს ზომები სააკაშვილის ჯანმრთელობის დასაცავად, მათ შორის, განიხილოს მისი გათავისუფლება სამედიცინო ნიშნით.
  • "პატიმრობა არ უნდა ნიშნავდეს სასიკვდილო განაჩენს", — თქვა ჰიუ უილიამსონმა, Human Rights Watch-ის ევროპისა და ცენტრალური აზიის დირექტორმა.
  • მისი შეფასებით, საქართველოს ხელისუფლებამ უნდა მოახდინოს ქვეყნის სისხლის სამართლის სისტემის ამ ასპექტის ჰუმანიზაცია და საერთაშორისო სტანდარტებთან შესაბამისობაში მოყვანა.