"რუსეთის აგრესია უკრაინაში: წინააღმდეგობის ერთი წელი", — ასე ჰქვია კონფერენციას, რომელზეც საქართველო-უკრაინის ურთიერთობებს განიხილავენ.

რატომ არის მნიშვნელოვანი: ღონისძიება საქართველოში უკრაინის საელჩოს, აღმოსავლეთ ევროპის ცენტრი მრავალპარტიული დემოკრატიისთვის (EECMD) და ჰოლანდიის საელჩოს ორგანიზებით იმართება.

  • კონფერენცია საქართველო-უკრაინის ურთიერთობების, სამხედრო პერსპექტივებსა და საერთაშორისო გარემოს ცვლილებებს შეეხება.
  • მასში მონაწილეობენ საელჩოების წარმომადგენლები, პოლიტიკური ლიდერები, ადგილობრივი არასამთავრობო და საერთაშორისო ორგანიზაციები.

დეტალები: EECMD-ის აღმასრულებელი დირექტორის თქმით, მთავრობის წარმომადგენლები კონფერენციაზე პირადად მიიწვია, თუმცა ისინი დღევანდელ შეხვედრას არ დასწრებიან.

  • "მთავრობის არცერთი წარმომადგენელი დღეს არ არის ამ კონფერენციაზე, მიუხედავად იმისა, რომ საგარეო საქმეთა სამინისტროს, თავდაცვის სამინისტროს, საქართველოს პარლამენტს პირადად მე მივმართე წერილებით, თხოვნით, როგორც ოფიციალურად, ისე არაოფიციალურად, რომ მოსულიყვნენ და საკუთარი მოსაზრებები ეთქვათ. აქ მტრული გარემო არავისთვის არ არის. არცერთი მათგანი აქ არ იქნება და ეს არის ნიშანი იმისა, თუ რას ფიქრობს, რას გეგმავს და რას აპირებს, სამწუხაროდ, დღევანდელი ხელისუფლება", — ამბობს ლევან ცუცქირიძე.