The Last of Us-ის რეჟისორმა, იასმილა ჟბანიჩმა შოუს მე-6 სერიის შესახებ ახლახან მიცემულ ინტერვიუში ისაუბრა. რეჟისორმა პედრო პასკალის სამსახიობო ოსტატობა შეაქო და დასძინა, რომ მსახიობი გაბრიელ ლუნასთან ყოველი სცენის გადაღებისას ტიროდა, მაშინაც კი, როცა კამერა არ იღებდა.

მე-6 სერიაში პედრო პასკალის პერსონაჟი თავის ძმას შეხვდა, რომლის როლსაც გაბრიელ ლუნა ასრულებს. ძმების ემოციურმა საუბარმა მაყურებელზეც დიდი შთაბეჭდილება მოახდინა და სერიამ დიდი მოწონება დაიმსახურა.

ფოტო: HBO

"პედროსთვის ეს ძალიან ემოციური სცენაა. ჯერ გაბრიელი გადავიღეთ, შემდეგ კი პედრო. ამ დროს შევნიშნე, რომ ყოველ ჯერზე, როცა სცენას ვიმეორებდით, პედრო ტიროდა. მას კამერები არ უღებდნენ, თუმცა მაინც ტიროდა, რადგან პარტნიორს პერსონაჟის განსახიერებისთვის სრულყოფილ გარემოს უქმნიდა'', — განაცხადა სერიალის რეჟისორმა.

სცენარის მიხედვით, პედრო პასკალის პერსონაჟს სურს, დანიშნულების ადგილამდე უსაფრთხოდ მიიყვანოს ელი, რომელსაც ბელა რემზი განასახიერებს. ძმასთან დიალოგისას პედროს პერსონაჟი სწორედ ელის უსაფრთხოებაზე საუბრობს, რაც მაყურებლისთვისაც ემოციური აღმოჩნდა.

რეჟისორის თქმით, პედრომ და გაბრიელმა იდეალური სცენისთვის ბევრი იშრომეს და გადამღებ გუნდს რამდენიმე ცვლილება თავადაც შესთავაზეს. როგორც იასმილა ჟბანიჩი ამბობს, პედრო პასკალის ნიჭითა და სერიალის მიმართ მისი ენთუზიაზმით აღფრთოვანებულია.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…

ასევე იხილეთ: