SOU 2017 გრძელდება და ხვალ, თბილისის ვანო სარაჯიშვილის სახელობის სახელმწიფო კონსერვატორიის დიდი დარბაზში, ცნობილი ჯაზ-ტრიო, Dawn of Midi დაუკრავს.

„MIDI-ს განთიადი“ — ასე ითარგმნება კამერული ჯაზ-ტრიოს სახელი, რომელიც, თავის მხრივ, უკვე წარმოდგენას გვიქმნის მათი მიმართულების შესახებ. ეს კომუნიკაციის ტექნოკრატიულობისა და მასთან დაპირისპირებული პირველქმნილი ბგერების ნაზავია. ბენდის მუსიკალური მანერა მინიმალ-ჯაზია, რომლის ფარგლებშიც კლასიკური ინსტრუმენტებით იმპროვიზაცია საბოლოო ჯამში ელექტრონული მუსიკის ჟღერადობას გვაძლევს.

ფოტო: Unknow

პიანისტი ამინო ბელიამინი, კონტრაბასისტი ააკააშ ისრანი და დრამერი ყასიმ ნაქვი ერთმანეთს კალიფორნიის ხელოვნების ინსტიტუტში სწავლისას შეხვდნენ. ისინი წარმოშობით ინდოეთიდან, მაროკოდან და პაკისტანიდან არიან და მათივე თქმით, სწორედ მშობლიური ქვეყნების ტრადიციულმა მუსიკამ განაპირობა Dawn Of Midi-ს ჟღერადობა.

რას შეასრულებენ?

ტრიოს ბოლო ნამუშევარს მსოფლიო მუსიკალური პრესა მათ შემოქმედებით კულმინაციად ასახელებს. წინა იმპროვიზაციული კომპოზიციებისგან განსხვავებით, „Dysnomia“-ს 47-წუთიანი მსვლელობა წმინდად აკუსტიკური ხერხებით მიღწეული მათემატიკური სიზუსტის ნიმუშია. ჩრდილოეთ და დასავლეთ აფრიკის რიტმული სტრუქტურების გამოყენებით, მათი კონტრ-რიტმული თარგი ტექნოსა და ექსპერიმენტული ელექტრონიკის ნიმუშებს მოგვაგონებს, თუმცა ეს მიკრო-ფრაზირებები საბოლოოდ ჯაზ-ინტონაციაში ერთიანდება და ცოცხალი საკრავების ემოციურ გავლენებზე აქცენტირებს.

Dawn of Midi საქართველოში, კონსერვატორიის დიდ დარბაზში, 13 ივნისს დაუკრავს. კონცერტი 22:00-ზე დაიწყება. ბილეთების ფასი 20 ლარიდან იწყება და მისი შეძენა TKT.GE-ზე შეგიძლიათ.

შეგახსენებთ, რომ თანამედროვე მუსიკისა და ვიზუალური ხელოვნების საერთაშორისო ფესტივალი, SOU Festival 2017, 15 მაისს დაიწყო და 5 ივლისამდე გაგრძელდება. Sou Festival 2017 "Check in Georgia"-ს ფარგლებში იმართება.