ახალი კვლევის თანახმად, 2000 წლის წინანდელი ხის საგანი, რომელიც გარეგნულად პენისს ჰგავს, რომაელების სექს-სათამაშო შეიძლება ყოფილიყო. არტეფაქტი 1992 წელს ინგლისში, ერთ-ერთ თხრილში იპოვეს, რომელიც ადრიანეს კედელთანაა ახლოს. ცნობისთვის, კედელი იმპერატორ ადრიანეს მმართველობის პერიოდში რომის იმპერიის მიერ ბრიტანეთის კუნძულის გასწვრივ აიგო და საზღვრის ფუნქცია ჰქონდა. თავიდან არქეოლოგებმა ჩათვალეს, რომ ხის ობიექტი საკემსი ხელსაწყო იყო, თუმცა ახალი კვლევა ამტკიცებს, რომ ეს რომაელების სექს-სათამაშოა.

ხის ნივთის დანიშნულების შესახებ გაურკვევლობა იმ ფაქტმა გამოიწვია, რომ ის ფეხსაცმელების, ტანსაცმლის აქსესუარებისა და სხვადასხვა ზომის ხელსაწყოების გვერდით აღმოაჩინეს. თუმცა მკვლევრებმა არტეფაქტის დანიშნულება ხელახლა განიხილეს და მისი სავარაუდო ფუნქციები თავიდან გამოკვეთეს.

ფოტო: Vindolanda Trust

კვლევის მიხედვით, 16-სანტიმეტრიანი ხის ობიექტი შეიძლებოდა გამოეყენებინათ არა პენეტრაციისთვის, არამედ კლიტორის სტიმულაციისთვის. "ძალიან სავარაუდოა, რომ არტეფაქტი სექს-სათამაშო იყოს და თუ ასეა, მაშინ რომაული სამყაროდან ეს პირველი ნიმუშია. ეს აღმოჩენა გასაკვირი სულაც არ არის, რადგან რომაული ხელოვნებიდან და ლიტერატურიდან ვიცით, რომ ისინი დილდოებს იყენებდნენ. თუმცა არქეოლოგებს მათი სხვა ნიმუშები ჯერ არ უპოვიათ", — ამბობს ერთ-ერთი მკვლევარი.

მკვლევრები ფიქრობენ, რომ ერთ-ერთი მიზეზი, რის გამოც არქეოლოგები რომაულ დილდოებს ვერ პოულობენ ისაა, რომ ისინი უმეტესად ორგანული მასალისგან იყო დამზადებული. ხის დილდოსგან განსხვავებით კი, სხვა მასალა ჩვენამდე ნაკლებად მოაღწევდა.