თბილისის სააპელაციო სასამართლომ ვიტალი საფაროვის საქმეში ეთნიკური ნიშნით მკვლელობის მოტივი არ დაადასტურა.

რატომ არის მნიშვნელოვანი: ბრალდების მხარის მტკიცებით, საფაროვი ეთნიკურ ნიადაგზე განზრახ და ჯგუფურად მოკლეს.

  • პროკურორის თქმით, სააპელაციო სასამართლოს გადაწყვეტილება უზენაეს სასამართლოში გასაჩივრდება.

ვიტალი საფაროვი, 25 წლის უფლებადამცველი 2018 წლის 30 სექტემბერს თბილისის ცენტრში, ბარ ვარშავას (პუშკინის ქუჩა) მიმდებარე ტერიტორიაზე მოკლეს.

  • საფაროვის მკვლელობისთვის გიორგი სოხაძე და ავთანდილ კანდელაკიშვილი დააკავეს.
  • ბრალდებულებს 15-15 წლით თავისუფლების აღკვეთა მიუსაჯეს.
  • მათ რასობრივი, რელიგიური, ეროვნული ან ეთნიკური შეუწყნარებლობის გამო განზრახ მკვლელობას ედავებოდნენ. თუმცა მოსამართლემ დადასტურებულად არ მიიჩნია, რომ საფაროვი ეროვნული შეუწყნარებლობის მოტივით მოკლეს.
  • გადაწყვეტილება სააპელაციო სასამართლოში ყველა მხარემ გაასაჩივრა.

არასამთავრობო ორგანიზაციები თავიდანვე აცხადებდნენ, რომ ვიტალი საფაროვის მკვლელობის საფუძველი ქსენოფობიური მოტივი იყო.

  • ადამიანის უფლებათა ცენტრისა და ჩართულობისა და განვითარების ცენტრში კი ამბობდნენ, რომ საფაროვის მკვლელობაში ბრალდებულები ე.წ. ნეონაცისტური დაჯგუფების წევრები არიან.

დეტალები: ძალაში დარჩა თბილისის საქალაქო სასამართლოს მიერ მიღებული 2019 წლის გამამტყუნებელი გადაწყვეტილება ავთანდილ კანდელაკიშვილის და გიორგი სოხაძის მიმართ, რაც ჯგუფურ და განზრახ მკვლელობას მოიცავს.

  • თუმცა დაკავებულებს წარდგენილი ბრალიდან გამოერიცხათ მკვლელობის მოტივი — რასობრივი, რელიგიური, ეროვნული ან ეთნიკური შეუწყნარებლობა.