კონგოში გატაცებული მფრინავის, სოსო ოსორაულის მხარდასაჭერი აქციები ამერიკის შეერთებულ შტატებში, საბერძნეთსა და დიდ ბრიტანეთში საქართველოს საელჩოებთან გაიმართება. აქცია აშშ-ს დროით 11 ივნისს, დილის 11 საათზეა დაგეგმილი. ამის შესახებ On.ge-ს აშშ-ში აქციის ერთ-ერთმა ორგანიზატორმა, გიორგი თორღვაიძემ განუცხადა.

მისი თქმით, აქციის მიზანია, საქართველოს ხელისუფლებას მოსთხოვონ გატაცებული ოსორაულის დახმარება.

"აქამდე შეიძლება რამე გაგვეფუჭებინა ჩვენი აქტიურობით, ახლა ვერანაირ გზას ვეღარ ვხედავთ. ის განცხადება, რომ ფულის გამო იყო წასული არასწორია, ის საქართველოში ომში იბრძოდა და ბევრი გადაარჩინა. ის მას მერე წავიდა კონგოში რაც ის საქართველოში არ დააფასეს," - აღნიშნა თორღვაიძემ On.ge-სთან საუბრისას.

საქართველოს საჰაერო ძალების ყოფილმა სარდალმა ამირან სალუქვაძემ იმედთან საუბრისას განაცხადა, რომ ტყვეობაში მყოფი ქართველი მფრინავი ცოცხალია. მისი ინფორმაციით, გამტაცებლებმა ოსორაული სხვა ადგილზე გადაიყვანეს.

სოსო ოსორაული 2017 წლის 27 იანვარს კონგოს დემოკრატიული რესპუბლიკის ტერიტორიაზე ტყვედ ჩავარდა. ამ დღეს კონგოს დემოკრატიული რესპუბლიკის შეიარაღებულმა ძალებმა, ჩრდილოეთ კივუს პროვინციაში, ვირუნგას მთათა მასივში, ჩამქრალი ვულკანების - კარისიმბსა და მიკენოს შორის ერთბაშად ორი საბრძოლო MI-24 დაკარგეს.

ერთ MI-24-ს საქართველოს შეირაღებული ძალების ყოფილი მფრინავები: თადარიგის პოლკოვნიკი, 41 წლის იოსებ ოსორაული და თადარიგის უფროსი ლეიტენანტი, 37 წლის ვიაჩესლავ პლუჟნიკოვი მართავდნენ. ისინი აფრიკის ამ სახელმწიფოში კერძო კონტრაქტით მსახურობდნენ. მეორე ვერტმფრენის ეკიპაჟი კი ბელორუსიის მოქალაქეებით იყო დაკომპლექტებული.