ტაილანდში, კაცს, რომელმაც Facebook-ზე სამეფო ოჯახის შეურაცხმყოფელი პოსტი დაწერა 35-წლიანი პატიმრობა მიუსაჯეს.

გავრცელებული ინფორმაციით, მსჯავრდებულმა სოციალურ ქსელში 10 პოსტი, მათ შორის ვიდეო, კომენტარი და ფოტო გამოაქვეყნა, რომელიც ტაილანდში არსებულ კანონს არღვევს, რომელის მიხედვითაც სამეფო ოჯახის დაცინვა ან შეურაცხყოფა დასჯადია.

ბრალდების მტკიცებით, 33 წლის კაცმა, თავისი ყოფილი მეგობრის სახელითა და გვარით ყალბი პროფილი შექმნა და ტაილანდის სამეფო ოჯახის შეურაცხმყოფელი შინაარსის პოსტები გააკეთა. დაკავებული ბრალდებას უარყოფდა, მაგრამ ერთწლიანი პატიმრობის შემდეგ მან დანაშაული აღიარა.

პროკურატურა თავიდან 70 წლიან პატიმრობას ითხოვდა, თუმცა ბრალდებულს, საბოლოოდ, 35 წელი მიუსაჯეს.

ტაილანდში არსებული კანონით, დასჯადია მონარქიის არამხოლოდ პირდაპირი შეურაცხყოფა, არამედ ამ შინაარსის პოსტებისა და კომენტარების დალაიქებაც კი.