Birja Mafia-ს წევრი, გიორგი ქებურია ამბობს, რომ ის კლიპში პოლიციელისთვის ძაღლის ყელსაბამით გადაღების გამო დააკავეს. მისი თქმით, დაკავების დროს, პოლიციის თანამშრომლებმა უთხრეს: "რა გემღერებოდა, ახლა ვნახოთ, კიდევ თუ იმღერებო". ამის შესახებ ქებურიამ სასამართლო სხდომაზე განაცხადა.

"იყო ზეწოლაც, მეუბნებოდნენ რომ ჩემთვის უკეთესი იქნებოდა თუ ვაღიარებდი, რადგან გამოვიდოდი ჯარიმის სანაცვლოდ. ეს ყველაფერი მოხდა იქიდან გამომდინარე, რომ გადავიღეთ კლიპი, რომელშიც არის კადრები, პოლიციის ფორმაში გამოწყობილი მსახიობის, რომელიც არის დაჩოქილი და უკეთია ძაღლის ყელსაბამი," - განაცხადა Birja Mafia-ს წევრმა, გიორგი ქებურიამ.

როგორც ქებურიამ სასამართლო სხდომაზე თქვა, მას დაკავებისას არ გააცნეს თუ რისი უფლება ჰქონდა, ბორკილები ბრალის წარდგენის გარეშე დაადეს და ადვოკატის მოთხოვნა არ დააკმაყოფილეს.

ქებურიას სასამართლო სხდომაზე ბრალდების მხარე მისთვის პატიმრობის შეფარდებას მოითხოვს. სასამართლოს გადაწყვეტილება რამდენიმე წუთში გახდება ცნობილი. სხდომას ესწრება On.ge-ს ჟურნალისტი.

ბრალდება ქებურიას 2,3342 გრამი MDMA-ის შეძენა შენახვას ედავება. გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის საქმეზე მიმდინარეობს. ამ მუხლით გათვალისწინებული ქმედება ისჯება თავისუფლების აღკვეთით ვადით რვიდან ოც წლამდე ან უვადო თავისუფლების აღკვეთით.

რამდენიმე წუთის წინ Birja Mafia-ს წევრს, მიშკა მგალობლიშვილს თბილისის საქალაქო სასამართლომ 55 დღიანი წინასწარი პატიმრობა შეუფარდა. მგალობლიშვილის საქმის განხილვას სასამართლო 27 ივნისს გააგრძელებს.

საზოგადოების ნაწილი Birja Mafia-ს წევრების დაკავებას აპროტესტებს და პროკურატურას, მთავრობასა და პრეზიდენტს მანიფესტით მიმართავს.