შინაგან საქმეთა სამინისტროს ცნობით, სამართალდამცავებმა Birja Mafia-ს წევრები ნარკოდანაშაულისათვის დააკავეს.

უწყების მტკიცებით, მიშკა მგალობლიშვილის პირადი ჩხრეკისას ამოიღეს 1,4965 გრამი ნარკოტიკული საშუალება MDMA, ხოლო კიდევ ერთი პირის პირადი ჩხრეკისას იგივე ნივთიერება, რომლის ოდენობაც 2,3342 გრამია.

შსს აცხადებს, რომ დაკავებული ჩადენილ დანაშაულს აღიარებს.

გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ფაქტზე მიმდინარეობს (საქართველოს სსკ-ს 260-ე მუხლის მე-6 ნაწილის „ა“ ქვეპუნქტით).

ამ მუხლით გათვალისწინებული ქმედება ისჯება თავისუფლების აღკვეთით ვადით რვიდან ოც წლამდე ან უვადო თავისუფლების აღკვეთით.

ერთ-ერთი ბრალდებულის ცოლი, ერიკა კოპელენდი On.ge-სთან ინტერვიუში საპირისპირო ვერსიას ჰყვება და ამბობს, რომ მისი ქმარი, მიშკა მგალობლიშვილი ოთხშაბათს, 7 ივნისს გაუჩინარდა, მოგვიანებით, იმ დღესვე პოლიციამ მათი სახლი გაჩხრიკა. მისი ვარაუდით, დაჭერის მიზეზი გახდა ჯგუფის ახალი კლიპი Birja Mafia - Tsl Shavi Zeda, სადაც ერთ-ერთ კადრში პოლიციელს ძაღლის საყელური უკეთია. ვიდეოში პოლიციელის კადრი უკვე დაბლარულია.