კანონპროექტის ინიციატორები ის მოძალადე პრორუსები არიან, რომლებმაც 2021 წლის 5 ივლისს შეკრებილ ადამიანებზე, მათ შორის ჟურნალისტებზე იძალადეს.

რატომ არის მნიშვნელოვანი: საქართველოში შეკრებისა და მანიფესტაციის უფლება კონსტიტუციითაა დაცული, ინიციატორებს კი ახლა ამ უფლების შეზღუდვა უნდათ.

  • მათ და ძალადობრივი ჯგუფების სხვა წევრებმა ორი წლის წინ, 5 ივლისს რუსთაველის გამზირზე, სადაც ღირსების მარში იყო დაგეგმილი, აქტივისტების ოფისები დაარბიეს, ფიზიკურად გაუსწორდნენ 50-ზე მეტ ჟურნალისტს.
  • ნაცემი ოპერატორი, ლექსო ლაშქარავა 11 ივლისს გარდაიცვალა.

დეტალები: ჰომოფობიური, მოძალადე და პრორუსი ჯგუფის წევრები არ ერიდებიან და "რელიგიისა და ბავშვების" საკითხებზე აპელირებენ.

  • ითხოვენ აიკრძალოს ისეთი მანიფესტაციები და დემონსტრაციები, რომელიც, მათი მტკიცებით, "სექსუალური ორიენტაციის დემონსტრაციას, პოპულარიზაციასა და პროპაგანდას გულისხმობს".
  • ისინი აკრძალვის საჭიროებას კანონის ბოროტად გამოყენების თავიდან აცილებითა და შესაბამისად, საზოგადოების უსაფრთხოებისა და სიმშვიდის ინტერესებით ხსნიან, მაშინ, როდესაც სწორედ მათ ორგანიზებულ აქციაზე მიიღო დაზიანება არაერთმა ადამიანმა.
  • ასევე, ითხოვენ ისეთი მანიფესტაციის აკრძალვასაც, სადაც, შესაძლოა, ადგილი ჰქონდეს, რომელი "რელიგიური მიმდევრობის ადამიანთა რწმენის შეურაცხმყოფელ განცხადებებს".

რას ითხოვენ: განმარტებითი ბარათის მიხედვით, მოძალადე პრორუსებს სურთ, კანონით გათვალისწინებული ნორმების დარღვევაზე 3 000 ლარის ოდენობით ადმინისტრაციული ჯარიმა ან 25-დღიანი პატიმრობა დაწესდეს.

  • ორგანიზატორებისთვის კი, მათი კანონპროექტის მიხედვით, ნორმის დარღვევა 5 000-ლარიან ჯარიმას, ან 30-დღიან ჯარიმას გამოიწვევს.

კანონპროექტი მოძალადეებმა არანაკლებ 25 000 ამომრჩევლის მიერ საკანონმდებლო ინიციატივის წესით წარადგინეს.

  • კანონპროექტზე დადებითი შეფასება უკვე გასცა პარლამენტის იურიდიულმა დეპარტამენტმა და საბიუჯეტო ოფისმა. მეტიც, მიუთითეს, რომ კანონპროექტის განხილვის პროცედურის დაწყება მიზანშეწონილად მიაჩნიათ.