M&M’s-ის გადაწყვეტილებით, "მოლაპარაკე კანფეტებს", რომლებსაც ბრენდის მიერ წარმოებული ტკბილეულის რეკლამებში ვხედავდით, მსახიობი და კომიკოსი მაია რუდოლფი ჩაანაცვლებს. მოლაპარაკე კანფეტები წლების განმავლობაში M&M’s-ის რეკლამებში ჩნდებოდნენ, თუმცა მოგვიანებით ბრენდმა გადაწყვიტა, რომ ყავისფერი და მწვანე კანფეტების გარეგნობა შეეცვალა, რასაც დიდი კრიტიკა მოჰყვა.

M&M’s-ის ირგვლივ სკანდალი მაშინ დაიწყო, როცა ტელეწამყვანმა ტაკერ კარლსონმა განაცხადა, რომ ბრენდმა მოლაპარაკე ტკბილეულები "ნაკლებად სექსუალურები" გახადა. ამის არგუმენტად კარსლონმა M&M-ის მწვანე კანფეტის გარეგნობის ცვლილება მოიყვანა, რომლის მაღალქუსლიანი ჩექმები სპორტული ფეხსაცმელებით შეიცვალა.

ფოტო: M&M's

ამ ცვლილების შემდეგ M&M’s-მა განაცხადა, რომ მოლაპარაკე კანფეტების რეკლამებში ჩვენებას დროებით წყვეტდა, ახლა კი ბრენდმა თავის სახედ მაია რუდოლფი აირჩია. "არ გვეგონა, რომ გარეგნობის ცვლილება ინტერნეტში განხეთქილებას გამოიწვევდა. თუმცა ახლა გვესმის, რომ კანფეტების ფეხსაცმელმაც კი შეიძლება საზოგადოება ორად გაყოს, ეს კი უკანასკნელი რამაა, რაც M&M’s-ს სურს, რადგან ჩვენ ადამიანების გაერთიანებას ვცდილობთ", — ვკითხულობთ M&M’s-ის განცხადებაში.

M&M’s-მა ახალი განცხადებით საზოგადოებას ისიც შეატყობინა, რომ დღეიდან მოლაპარაკე კანფეტებს განუსაზღვრელი დროით უნდა დავემშვიდობოთ. "გადავწყვიტეთ, ჩვენი მოლაპარაკე ტკბილეული განუსაზღვრელი ვადით შეგვეჩერებინა. მათ ნაცვლად სიამაყით წარმოგიდგენთ ჩვენი ბრენდის ახალ სახეს, ყველასათვის საყვარელ მაია რუდოლფს, რასაც ამერიკა ერთხმად დაეთანხმება. გვჯერა, რომ მაია თავის არაჩვეულებრივ ნიჭსა და ძალას გამოიყენებს ისეთი სამყაროს შესაქმნელად, რომელშიც თავს ყველა კარგად იგრძნობს", — ვკითხულობთ M&M’s-ის განცხადებაში.